LÈS 6
David No Tabatin Miedu
Kiko abo ta hasi ora bo tin miedu?— Podisé bo ta bai serka bo mama òf bo tata. Pero no ta nan so por yuda bo. Bo sa ken tambe por yuda bo?— Sí, Yehova. I e tin mas poder ku tur hende! Ban papia awor di un mucha hòmber den Beibel ku yama David. E tabata sa ku semper Yehova lo yud’é. P’esei e no tabatin miedu.
For di tempu ku David tabata bebi, su tata ku su mama a siñ’é stima Yehova. Esei a yuda David pa e no tin miedu, asta ora un kos pasa ku por duna hende miedu. E tabata sa ku Yehova ta su Amigu i ku Yehova lo yud’é. Un dia ku David tabata kuida karné, un leon grandi a bini anto kue un di e karnénan den su boka! Bo sa kiko David a hasi? El a kore e leon su tras, gar’é na su barba anto dal e mata! Anto un biaha ku un ber a ataká e karnénan, David a mata e tambe! Ken bo ta kere a yuda David?— Sí, Yehova.
Un otro biaha tambe David tabatin masha hopi kurashi. E sòldánan di Israel tabata bringa kontra un grupo di hende ku yama ‘filisteo.’ Un di e sòldánan filisteo tabata un hòmber masha masha haltu mes, un gigante! Su nòmber ta Goliat. E gigante ei tabata tenta e sòldánan di Israel i Yehova tambe. Goliat tabata bisa e sòldánan di Israel ku si nan no bin bringa kuné, nan ta kobarde. Pero e sòldánan di Israel tabatin muchu miedu di bringa kuné. Ora David a tende kiko tabata pasando, el a bisa Goliat: ‘Ami sí ta bai bringa ku bo! Yehova lo yuda mi, anto mi ta bai gana bo tambe!’ Bo no ta haña ku David tabatin hopi kurashi?— Sí, hopi mes. Bo ke sa kiko a pasa e ora ei?
David a kue sinku piedra lizu i su slenger. Un slenger ta un repi largu di kueru òf di otro kos, ku nan tabata usa pa zuai piedra kuné. Asina David a sali bai bringa ku e gigante. Ora Goliat a mira kon yòn David ta, el a tenta David! Pero David di kuné: ‘Abo ta bin bringa ku mi ku un spada, pero ami ta bai bringa ku bo den nòmber di Yehova!’ E ora ei el a pone un piedra den su slenger, kore bai riba Goliat anto zuai e piedra stret riba dje. E piedra a dal Goliat presis den su frenta, anto el a kai abou na suela morto! E filisteonan a haña asina tantu miedu ku nan tur a saka kareda kore limpi bai. Kon un mucha hòmber yòn manera David por a gana un gigante asina?— Ta Yehova a yud’é, i Yehova tin muchu mas poder ku e gigante ei tabatin!
David no tabatin miedu pasobra e tabata sa ku Yehova lo yud’é
Kiko e historia di David ta siña bo?— Yehova tin mas poder ku tur hende. I e ta bo Amigu. P’esei, e biaha akí ku bo tin miedu, kòrda ku Yehova por yuda bo haña kurashi!
