Vass dusht du, vann du dich feichsht?— Fleicht gaysht zu dei maemm un daett fa hilf. Avvah, ‘s is aw ebbah shunsht es dich helfa kann. Eah hott may power es ennich ebbah shunsht. Vaysht du veah sell is?— Yau, ‘s is Jehova. Vella shvetza veyyich en yungah boo in di Bivvel es Dawfit hayst. Eah hott gvist es Jehova een immah helfa zayld, so eah hott sich nett kfeicht.

Funn di zeit es da Dawfit en baybi voah, henn sei maemm un daett een gland fa leevi havva fa Jehova. Dess hott da Dawfit kolfa fa sich nett feicha even vann shreklichi sacha kaebbend henn zu een. Eah hott gvist es Jehova sei Friend is, un es Eah een helfa dayt. Ay moll, vo da Dawfit am acht gevva voah uf di shohf, is’n grohsah lion kumma un hott en shohf grikt! Vaysht du vass da Dawfit gedu hott? Eah is da lion nohch ganga un hott een doht gmacht mitt sei hend, un vo en beah boviaht hott di shohf greeya, hott eah een aw doht gmacht! Veah denksht du hott da Dawfit kolfa sell du?— Yau, es voah Jehova.

Es voah en annah moll vo da Dawfit reeli brayf voah. Di Israeliddah voahra am fechta geyyich di Philishtah. Ayns funn di Philishtah iahra soldiers voah en reeli grohsah mann, eah voah en giant! Eah hott Goliath kaysa. Deah giant voah am fann macha ivvah di Israeliddah iahra soldiers, un ivvah Jehova. Da Goliath hott di Israeliddah soldiers ksawt fa kumma un geyyich een fechta. Avvah awl di Israeliddah henn sich zu oahrich kfeicht fa fechta geyyich een. Vo da Dawfit’s keaht hott, hott eah da Goliath ksawt: ‘Ich fecht geyyich dich! Jehova zayld mich helfa, un ich zayl dich umbringa!’ Denksht du da Dawfit voah brayf?— Yau, reeli brayf. Vitt du vissa vass’s neksht kaebbend hott?

Da Dawfit hott sei shling un fimf gladdi shtay gnumma, un is ganga da giant fechta. Vo da Goliath ksenna hott vi yung es da Dawfit voah, hott eah fann gmacht ivvah een. Avvah da Dawfit hott ksawt: ‘Du kumsht zu mich mitt en shvatt, avvah ich kumm zu dich mitt da nohma funn Jehova!’  No hott eah en shtay in sei shling gedu, un is geyyich da Goliath kshprunga. Eah hott da shtay kshmissa un hott da Goliath gedroffa grawt in sei kobb! Da giant is doht uf da bodda kfalla! Di Philishtah voahra fashkeaht! Si sinn awl vekk kshprunga. Vi hett en yungah boo vi da Dawfit en giant doht macha kenda?— Jehova hott een kolfa, un eah hott may power katt es sellah giant.

Vass kansht du lanna funn da Dawfit sei shtoahri?— Jehova hott may power es ennich ebbah shunsht. Un, eah is dei Friend. So, ‘s neksht moll es du dich feichsht, fagess nett es Jehova dich helfa kann brayf sei!