جدوں توانوں ڈر لگدا اے تے تُسی کیہہ کردے او؟‏—‏ ہو سکدا اے تُسی نس کے اپنی امی یاں ابو کول چلے جاندے او۔‏ پر کوئی ہور وی اے جیہڑ‌ا تواڈی مدد کر سکدا اے۔‏ اوہ سب توں زیادہ طاقت‌ور اے۔‏ کیہہ توانوں پتہ اے کہ اوہ کون اے؟‏—‏ اوہ یہوواہ خدا اے۔‏ آؤ،‏ اِک منڈے دی کہانی پڑھنے آں جنہوں پتہ سی کہ یہوواہ خدا ہمیشاں اوہدی مدد کرے گا۔‏ ایس لئی اوہ کسے توں وی نئیں سی ڈر دا۔‏ اوس منڈے دا ناں داؤد سی۔‏

جدوں داؤد چھوٹے بچے سن تے اوہناں دے امی ابو نے اوہناں نُوں یہوواہ خدا نال پیار کرنا سکھایا۔‏ داؤد جان دے سن کہ یہوواہ خدا اوہناں دا دوست اے تے ہمیشاں اوہناں دی مدد کرے گا۔‏ ایس لئی داؤد کسے توں وی نئیں ڈر دے سن۔‏ اِک واری داؤد اپنیاں بھیڈاں دی راکھی کر رہے سن تے اچانک اوتھے اِک ببر شیر آ گیا۔‏ اوہ اِک بھیڈ نُوں چُک کے لے گیا۔‏ جدوں داؤد نے ایہہ ویکھیا تے اوہناں نے کیہہ کیتا؟‏ اوہ شیر دے پچھے گئے تے اوہنوں پھڑ کے مار دِتا۔‏ فیر اِک واری اِک ریچھ نے داؤد دی بھیڈ اُتے حملہ کیتا۔‏ داؤد نے ریچھ نُوں مار سُٹیا۔‏ تواڈے خیال چ ببر شیر تے ریچھ نُوں مارن لئی کنہے داؤد دی مدد کیتی؟‏—‏ یہوواہ خدا نے۔‏

اِک ہور موقعے تے وی داؤد نے بڑی بہادری وکھائی۔‏ اُس ویلے بنی‌اِسرائیل،‏ فلستی فوج نال جنگ کر رہے سن۔‏ فلستی فوج وچ اِک بڑا اُچا لما تے طاقتور فوجی سی۔‏ اوہدا ناں جولیت سی۔‏ اوہ یہوواہ خدا تے اِسرائیلی فوجیاں دا بڑا مذاق اُڈا رہیا سی۔‏ اوہنے اِسرائیلی فوجیاں نُوں کہیا:‏ جے تواڈے چ ہمت اے تے آ کے میرے نال لڑو!‏ سارے اِسرائیلی فوجی اوہدے توں ڈر رہے سن۔‏ کوئی وی اوہدے نال لڑنا نئیں سی چاہندا۔‏ جدوں داؤد نُوں ایس گل دا پتہ لگا تے اوہناں نے جولیت نُوں کہیا:‏ مَیں تیرے نال لڑاں گا۔‏ یہوواہ خدا میری مدد کرے گا تے مَیں تینوں ہرا دیاں گا۔‏ داؤد کِنّے بہادر سن،‏ ہے نا؟‏—‏ اوہ کسے توں وی نئیں ڈر دے سن۔‏ پتہ اے فیر کیہہ ہویا؟‏

داؤد نے اپنی فلاخن پھڑی تے پنج پتھر لے کے جولیت نال لڑن گئے۔‏ جدوں جولیت نے ویکھیا کہ داؤد تے منڈا جیہا ای اے تے اوہ داؤد دا مذاق اُڈاؤن لگ پیا۔‏ پر داؤد نے جولیت نُوں کہیا:‏ تُوں تلوار لے کے میرے نال لڑن آیا ایں پر مَیں یہوواہ خدا دا ناں لے کے تیرے نال لڑن آیا واں۔‏ فیر داؤد نے اپنی فلاخن وچ اِک پتھر پایا تے جولیت وَل دوڑے۔‏ اوہناں بڑے زور نال پتھر جولیت وَل سُٹیا۔‏ تے پتھر سدھا جا کے جولیت دے متھے چ وجیا۔‏ جولیت اوتھے ای ڈھیر ہو گیا۔‏ ایہہ ویکھ کے فلستی  ڈر گئے تے اوتھوں نس گئے۔‏ داؤد تے اینے وڈے نئیں سن،‏ فیر وی اوہناں نے اینے طاقت‌ور آدمی نُوں کیویں مار لیا؟‏—‏ یہوواہ خدا دی مدد نال۔‏ یہوواہ خدا جولیت نالوں کِتے زیادہ طاقت ور سی۔‏

تُسی داؤد دی کہانی توں کیہہ سکھیا اے؟‏—‏ یہوواہ خدا سب توں زیادہ طاقت‌ور اے۔‏ اوہ تواڈا دوست اے۔‏ ایس لئی جدوں توانوں ڈر لگے تے یاد رکھو کہ یہوواہ خدا تواڈی مدد کرے گا۔‏ ایس طرحاں تُسی بہادر بن جاؤ گے۔‏