¿Mantsapakurninqa imatataq ruranki?. . . Itsa papänikita y mamëkita yanapashunëkipaq mañakunki. Peru kanmi juk mas puëdeq amïgu yanapashunëkipaq. ¿Pitaq?. . . Awmi Jehovämi. Mañakïta puëdinkim yanapashunëkipaq. Tsëtam Davidpis rurarqan. Jehoväman markäkurmi (yärakurmi) jövinllaraq këkarnin mantsapakoqtsu. Bibliam pëpita willakun.

Llullu kanqampitam Davidtaqa papänin y mamänin Jehoväta kuyanampaq yachatsiyarqan. Tsëmi mantsapakurqantsu. Pasanqampa wakin nunakuna pasarqa, itsa mantsapakuyanman karqan. Davidqa musyarqanmi amïgun kar Jehovä yanapanampaq kaqta. Juk kutim, üshankunata cuidëkaptin, juk leon üshanta apakurqan. ¿Imatataq David rurarqan? Leontam wanuratsirqan. Y üshankunata salvarmi, juk ösutapis wanuratsirqan. ¿Pitaq Davidta yanaparqan mana mantsapakunampaq?. . . Rasuntam ninki, Jehovämi.

Jina juk kutichöpis Davidqa manam mantsapakurqantsu. Israelïtakunam filisteukunawan guërrachö kayarqan. Y Goliat jutiyoq filisteu soldädum, israelïtakunapita y Jehoväpita burlakurqan. ¡Alläpa jatun nunam karqan! Y kënömi neq: “¿Mëqëkikunataq noqawan pelyëta munayanki?”. Llapankunam mantsayaq y manam mëqampis pëwan pelyëta munaqtsu. Peru David tsëta wiyarirnam, “¡noqam qamwan pelyashaq! ¡Jehovä yanapamaptinmi ganashqëki!” nirqan. ¿Davidqa manam mantsapakurqantsu aw?. . . Awmi, manam mantsapakurqantsu. Y tsëpitaqa, ¿imataq pasakurqan?

Davidqa pitsqa luchoq rumikunata y juk warakata tsarirkurmi tsë jatun nunawan pelyaq ëwarqan. David jövinlla kanqanta rikëkurnam, Goliatqa burlakurqan. Peru Davidnam nirqan: “Qamqa shamunki juk espädëkiwanmi, ¡peru noqaqa shamö Jehoväpa jutinchömi!”. Tsënam Davidqa tsë mantsëpaq nunaman cörripa ëwar, warakanman rumita churarkur urkunchö warakëkurqan. ¡Y Goliatnam ishkirir wanurirqan! Tsënam filisteukunaqa,  alläpa mantsakar qeshpir ëwakuyarqan. ¡Davidqa jövinlla këkarmi tsë mantsëpaq jatun nunata wanuratsirqan! ¿Imanirtaq vencirqan?. . . Jehovä yanapaptinmi, ¡porqui pëqa mantsëpaq jatun nunakunapitapis mas puëdeqmi!

¿Imatataq yachakuntsik David pasanqampita?. . . Pï nunapitapis Jehovä mas puëdeq kanqantam. Tsëmi imëllapis mantsakurqa, Jehoväqa amïguïki (amïguyki) y yanapashoqniki kanqanta yarpänëki.