¿Manchaihuan cashpaca imatataj rurashcangui?... ¿Yaya mamata ayudachun mañashcanguichu? Shinapish shujtaj ayudajmi tiyan. Paica tucuicunata yalli achca podertami charin. ¿Pi cashcata yachanguichu?... Ari, Jehovami can. Canta ayudachunca mañanallami cangui. Chaitami Davidca rurarca. Huambraraj cashpapish Jehovapi shunguta churashcamantami mana mancharca. Davidmantaca Bibliapimi ashtahuan parlan.

Davidtaca paipaj yaya mamaca uchillamantapachami Jehovata cꞌuyachun yachachirca. Chaimantami achca llaquicunata charishpapish mana mancharca. Jehová paipaj amigo cashcamantami ayudanata crirca. David ovejacunata michicujpica, ¡shuj león shamushpami shuj ovejata aparca! ¿Davidca imatataj rurarca? Leonta catishpami paipaj maquihuan huañuchishca nin. Shuj osopish ovejacunata micusha nijpica huañuchircami. ¿David ama manchachunca pitaj ayudarca?... Ari, Jehovami ayudarca.

David mana manchashcata ashtahuan yachashun. Israelitacunaca filisteocunahuanmi macanacucurca. Filisteocunapurapica yallitaj jatun shuj soldadomi tiyarca. Paipaj shutica Goliatmi carca. Paica israelita soldadocunatapish Jehovatapish cꞌamishpami asicurca. Israelitacunataca: “¡Pitaj ñucahuan macanacusha nin!” nircami. Shinapish tucuicunami paitaca mancharca. Chaimantami paihuanca ni pi mana macanacusha nirca. Davidca Goliat ima nishcata uyashpami: “¡Ñucami canhuan macanacugrini! ¡Jehová ayudajpimi cantaca mishasha!” nircami. ¿Davidca mancharcachu?... Mana, mana mancharcachu ¿qꞌuipaca imataj tucurca?

Davidca 5 llambujlla rumicunatapish shuj huaracatapish japishpami Goliathuan macanacunaman rirca. David shuj huambralla cashcata ricushpami Goliatca asirca. Davidca: “Canca ñucapajmanca espadahuanmi shamungui. Ashtahuanpish ñucaca Taita Diospaj shutipimi shamuni” nircami. Chashnami Davidca  Goliatpajman callpashpa huaracapi shuj rumita churashpa shitarca. Davidca rumihuan frentepi cushpami Goliatta huañuchirca. Filisteocuna chaita ricushpaca achcata mancharishpami callpashpa rircacuna. ¡Davidca huambralla cashpapish Goliattami misharca! ¿Imamantashi Davidca misharca?... Jehová ayudashcamanta. ¡Diosca tucuicunata yalli achca podertami charin!

¿Cai leccionpica imatataj yachashcanchij?... Jehová Diosca tucuicunata yalli achca podertami charin. Shinashpaca manchaihuan cashpaca, Jehová cambaj amigo cashcatami yuyarina cangui. Paica ama manchachunmi ayudanga.