Ckam, áicap sustuscka tias, ¿imát ʼruanqui?​— Mamayquiman o tatayquiman yanapát mascas rinqui. Pero, pipas astaan tían, ima ckamta yanapasuyta atin. Paycka, tucuycunamanta astaan atiyníoj can. ¿Yachanqui pichus can?​— Ari, Jehová Dius can. ʼRimasúysh, suj moso ckari Bibliamanta, Davichu sutichascka. Pay yachara ima Jehová túcuy tiempupi payta yanapanman, chayraycu, pay mana sustúcoj cara.

Davichu huahuita casckanmantapacha, tatasnin, Jehovát munayta payta yachacherancu. Cá Davichút yanapara, mana sustucunánpaj, mana alli cosas sucedepuptin ima payta sustúchej cara. Pay yachara, ima Jehová paypa yanasun casckanta y Jehová payta yanapayta atera. Suj punchau, áicap Davichu huaquin ovejasta cuidashcara, suj atun león amora y suj ovejata siminhuan apera. ¿Ckam yachanquichu, imát Davichu ʼruara? ¡Pay leonta ckatis huanchera! Y chaymantá, áicap suj osu suj oveját apera, Davichu chaytapas huanchera. Ckam, ¿imát creenqui, pichus Davichút yanapara?​— Ari, Jehová cara.

Suj punchaupas, Davichu ancha corajudu cara. Israelitascka luchashcarancu suj pueblúan, Filisteos sutichascka. Suj soldadu filisteusmanta, suj ckari pi, ¡ancha, ancha atun cara ó! Sutin Goliat cara. Cay atun ckari, soldadus israelitasmanta y Jehovamantapas burlacus tiara. Pay soldadus israelitasta amunancunápaj, y payhuan luchanancunápaj desaficora. Pero israelitascka payhuan peliáypaj, ancha sustút aperancu. Áicap Davichu chayta uyarera, pay Goliatta nipora: ‹¡Nocka ckamhuan peliásaj, Jehová yanapáaj ʼrin y ckamta vencésoj ʼrini!› ¿Creenquichu ima Davichu corajudu cara?​— Ari, ancha corajudu cara. ¿Yachanaanquichu, ima chaymantá sucedera?

Davichu suj hondát y pishcka ʼrumis lluspis apis, ancha atun ckarían peliáypaj llojsera. Goliat Davichút ckaara, ancha mositu casckanta, chayraycu burlacora. Pero Davichu payta nipora: ‹Ckam suj espadaan nockaman amunqui, ¡pero nocka Jehóvap sutinpi ckamman ’rini!› Chaymantá pay hondanpi suj ʼrumít churara,  Goliatman huairacachara, y payman checkalla chockara. ¡Cá ʼrumi, Goliatpa pajranpi ckos utquichipora! ¡Chá atun ckari, huañuscka ashpaman urmara! Filisteos ancha sustucorancu y túcuy paycuna aickerancu. Davichu suj mositu cas, ¿imaina suj atun ckarít venceyta atera?​— Jehová payta yanapara, ¡Jehová chay atun ckarimanta, astaan ancha atiyníoj cara!

Ckam, Davíchup historianmanta, ¿imát aprendeyta atinqui?​— Jehová tucuycunamanta astaan atiyníoj can. Y paycka yanasuyqui can. Chayraycu, si huaquin cutis sustucunqui, yúyay, corajudu canayquípaj Jehová yanapasuyta atin.