¿Imatam ruwanki manchakuspayki? . . . Yaqapaschá tayta-mamaykipa yanapakuyninta maskanki. Ichaqa, ¿paykunallachu yanapasunkiman? Manam, yanapasunkimanmi pi runamantapas aswan atiyniyoq runa. ¿Yachankichu pi kasqanta? . . . Arí, Jehova Diosmi. Paytaqa haykapipas mañakuwaqmi yanapasunaykipaq. Chaytam Davidpas ruwarqa. Payqa Jehova Diospi hapipakusqanraykum qarinchakuq mozo karqa. Paymantam Bibliapi willakun.

Warmachallaraq kasqanmantam tayta-mamanqa Jehova Diosta kuyananpaq yachachirqa. Chayraykum manchakunapaq kaqkuna pasaptinpas, mana manchakuq karqa. Payqa yacharqam Jehova Dios amistadnin kasqanta hinaspa yanapay atisqantapas. Huk kutipim, ovejachankunata David michichkaptin, huk leon hamuruspan apakurqa. ¿Yachankichu imatam David ruwarqa? Leonta qatispanmi wañurachirqa. Huk kutipipas, ovejachankunata ukumari mikuruyta munaptinmi, chay kutipipas wañurachirqa. ¿Pitaq Davidta yanaparqa mana manchakuq kananpaq? . . . Arí, Jehova Diosmi.

Huk kutipipas qarinchakuq kasqantam Davidqa qawachirqa. Filistea nacionniyoq runakunawan Israel runakuna peleaptinku. Huk kaqnin Filisteo runapa sutinmi karqa Goliat, payqa hatu-hatun runam karqa. Paymi Jehova Diosmanta hinaspa Israel soldadokunamanta burlakurqa. Soldadokunatam kaynata niq: “¡Pim ñoqawan peleayta munan!”, nispan. Ichaqa llapallankum manchakuqku, hinaspam mana pipas peleayta munarqachu. Goliatpa nisqanta David uyariruspanmi nirqa: “¡Ñoqam qanwan peleasaq! ¡Jehova Diosmi yanapawanqa!”, nispa. ¿Imayna kasqantam David qawachirqa? . . . Arí, qarinchakuq kasqantam. Chaymanta, ¿imatam ruwarqa?

Davidqa warakanta hinaspa pichqa lluchka rumichakunata aparikuspanmi, chay hatunkaray runawan peleananpaq rirqa. David mozochallaraq kasqanta qawaspanmi Goliatqa paymanta asikurqa. Hinaptinmi David nirqa: “Qanmi ñoqaman hamuchkanki espadawan, ñoqam ichaqa qanman hamuchkani [Jehova] Diospa sutinpi”, nispa. Davidqa hatunkaray runapa kasqanmanmi kallpaylla rirqa, hinaspanmi rumita  warakanman churaykuspan warakarurqa. ¡Rumiqa kamas urkunpimá hapirurqa! Chaymi Goliatqa wañuruspan pampaman wichiykurqa. Chayta Filistea runakuna qawaspankum mancharikuymanta ayqekurqaku. Davidqa mozochallaraq kaspanpas hatunkaray runatam wañurachirqa. ¿Yachankichu pim yanapasqanta? . . . Arí, Jehova Diosmi yanaparqa. Payqa maynaña hatun runamantapas aswan atiyniyoqmi.

¿Imatam yachachiwanchik Davidta pasasqan? . . . Jehova Diosqa pimantapas aswan atiyniyoqmi. Chaymi manchakuspaykiqa kayta yuyarinayki: Jehova Diosqa amistadnikim hinaspapas yanapasunkimanmi qarinchakuq kanaykipaq.