6 YACHACHIKUY
Davidqa mana manchakuqmi karqan
¿Imatan ruwanki manchasqa kaspayki?... Yaqapaschá rinki mamaykiman taytaykiman yanapanasuykikupaq. Ichaqa kanmi huk yanapaqniykipas. Payqa aswan atiyniyoqmi hukkunamantaqa. ¿Yachankichu pi kasqanta?... Arí, Jehová Diosmi. Yachasun huk waynamanta, sutinmi David. Payqa Jehová Diospin confiarqan, chaymi mana imamantapas manchakurqanchu.
Davidqa Jehová Diostan munakurqan, chaytaqa tayta-mamanmi yachachirqan wawallaraq kasqanmantapacha. Chay yachachisqankun Davidta yanaparqan mana manchakuq kananpaq. Payqa yacharqanmi imapiña tarikuqtinpas Jehová Dios yanapananta. Huk kutinmi David ovejankunata michisharqan, hinan huk hatun león huk ovejachanta siminpi aparikurqan. ¿Imatan David ruwarqan? Payqa qhepanta rispan leonta wañuchimurqan, yaqachus hina makillanwan wañuchirqan. Huk osopas ovejantan hap’iyta munallarqantaq, Davidqa chay osotapas wañuchillarqantaqmi. ¿Pin Davidta yanaparqan?... Arí, Jehová Diosmi yanaparqan.
Huk kutipipas Davidqa rikuchirqanmi mana manchakuq kasqanta. Israelitakunaqa Filistea runakunawanmi maqanakusharqanku. Chay Filistea runakunamanta hukninmi karqan nishu hatunpuni, sutinmi karqan Goliat. Chay hatun runan israelitakunamanta Jehová Diosmantapas burlakusharqan. Goliatqa israelitakunatan nirqan paywan maqanakuq rinankupaq. Ichaqa llapa israelitakunan manchasqa kasharqanku. Chayta uyarispan Davidqa Goliat runata nirqan: “¡Ñoqan qanwan maqanakusaq! Jehová Diosmi yanapawanqa, chaymi atipasqayki”, nispa. ¿Mana manchakuqchu David karqan? ¿Ima ninkin?... Arí, mana manchakuqmi karqan. Yachasun chay qhepaman imachus pasasqanmanta.
Davidqa warak’anta phisqa llusk’a rumikunatawan aparikuspan chay hatun runawan maqanakuq rirqan. Ichaqa Goliatmi Davidmanta asikurqan nishu wayna kasqanta rikuspa. Davidmi ichaqa nirqan: “¡Qanqa espadayoqmi hamuwanki, ñoqan ichaqa Jehová Diospa sutinpi hamuyki!”, nispa. Chay qhepamanmi Davidqa Goliatman phawaykuspa warak’arqan. ¡Rumiqa mat’inmanmi chayarqan! ¡Chay hatun runaqa pampamanmi wañusqa chayarqan! Hinan Filistea runakunaqa sinchita mancharikuspa ayqekurqanku. ¿Pin Davidta yanaparqan chay hatunkaray runata atipananpaq?... Arí, Jehová Diosmi yanaparqan.
Davidqa yacharqanmi Jehová Dios yanapananta chaymi mana manchakurqanchu
¿Imatan kay willakuy yachachiwanchis?... Jehová Diosqa aswan atiyniyoqmi pi runamantapas. Manchasqa kaqtiykiqa Jehová Diosmi yanapasunki mana manchakuq kanaykipaq. Hinaspapas payqa amigoykin.
