¿He aha taꞌa meꞌe mo aŋa mo riꞌa⁠-⁠riꞌa ꞌoꞌou?... Peaha, he hahine koe ki tuꞌu matuꞌa. E ai takoꞌa rō ꞌā e tahi kope mo haꞌūꞌū atu. Nei kope ata pūai ki te taꞌatoꞌa. ¿Ko ꞌite a koe ko ai?... Ko Iehoha. E riva nō koe mo nonoꞌi ki a Iehoha mo haꞌūꞌū atu. Peira i aŋa ai e tahi taŋa ꞌāpī, toꞌona ꞌīŋoa ko Tavita. I te meꞌe era ko ꞌite riva⁠-⁠riva ꞌā he haꞌūꞌū e Iehoha ki a īa, oīra e taꞌe riꞌa⁠-⁠riꞌa era. Te Puka o te ꞌAtua e ꞌaꞌamu rō mai ꞌā o ruŋa i a īa.

Mai te iti⁠-⁠iti haŋa ꞌā a Tavita i hāpī ai e toꞌona matuꞌa mo here ki a Iehoha. Oīra e taꞌe riꞌa⁠-⁠riꞌa era i te hora ꞌati. Ko ꞌite ꞌā ma Iehoha e haꞌūꞌū i a īa o te ai he repahoa ꞌoꞌona. E tahi mahana e hapaꞌo ꞌā Tavita i taꞌana mamoe, he vari atu e tahi reone he toke e tahi mamoe he maꞌu he oho. He tute e Tavita i tū reone era e he tiŋaꞌi hai toꞌona rima. E takoꞌa i vari rō e tahi oso, mo tiŋaꞌi te mamoe, he toꞌo mai e Tavita he tiŋaꞌi he haka mate takoꞌa, ¿ꞌA ꞌai a Tavita i haꞌūꞌū?... He aŋi ꞌā, a Iehoha mau ꞌā i haꞌūꞌū.

I tano era e tahi mahana, e tamaꞌi ꞌā te Israelita ki te taŋata o te kaiŋa o Filistea. E tahi matatoꞌa o te Filisteo, te ꞌīŋoa ko Goliat, ai ruŋa era toꞌona nui⁠-⁠nui. Te aŋa ꞌaꞌana he haka meꞌe⁠-⁠meꞌe ki te Israelita e ki a Iehoha takoꞌa. Pe rā ꞌā e kī era ki te Israelita, mo eꞌa e tahi o rāua mo moto ki a īa. Te Israelita ko riꞌa⁠-⁠riꞌa tahi ana. He ŋaroꞌa ia e Tavita, e ꞌina a īa kai riꞌa⁠-⁠riꞌa pē te Israelita, oīra i kī ai ki a Goliat: “I au he moto atu ki a koe, e ma Iehoha e haꞌūꞌū mai e he rē koe au”. ¿Pe hē ki tuꞌu manaꞌu? ¿I riꞌa⁠-⁠riꞌa rō a Tavita?... ꞌIna, ꞌina kai riꞌa⁠-⁠riꞌa a īa.

He toꞌo mai a Tavita e rima māea poro ꞌe e tahi herepata. He eꞌa he moto ki a Goliat, i uꞌi era e Goliat a Tavita he poki e tahi, he kata, he haka meꞌe⁠-⁠meꞌe. He pahono e Tavita: “A koe e oho mai ena ki a au hai hoe roa⁠-⁠roa, e au e oho atu ena ki a koe hai ꞌīŋoa o Iehoha”. He tahuti a Tavita, e he tau e tahi māea hai tū herepata era ki a Goliat. He hetu te māea ki te tira o Goliat, e he hiŋa ki raro e he mate. I tikeꞌa era e  te Filisteo nei meꞌe, he vevēri ananake e he te⁠-⁠tere. ¿Pe hē te taŋa ꞌāpī pē Tavita i rē ai ki te taŋata nui⁠-⁠nui nei?... O te ai a Iehoha i haꞌūꞌū. Ata hau te pūai o Iehoha ki te kope nui⁠-⁠nui taꞌatoꞌa.

¿He aha te meꞌe mo hāpī mai te ꞌaꞌamu o Tavita?... Ata hau te mana pūai o Iehoha ki te taꞌatoꞌa taŋata. Oīra mo riꞌa⁠-⁠riꞌa ꞌoꞌou ꞌina ko rehu, a Iehoha he repahoa ꞌoꞌou ꞌe e riva nō mo haꞌūꞌū atu mo taꞌe riꞌa⁠-⁠riꞌa ꞌoꞌou.