Со кереа кеда дараја?— Шај тогаш родеа те даја хем те даде. Ама, иси панда некој со шај те поможинел ту. Ов тано најсилно. Џанеа ли кој тано адава?— Оја, о Јехова. Акана ка дикха башо јекх терно чхаво, лескоро анав сине Давид. Ов џанела сине дека о Јехова секогаш ка поможинел ле хем адалеске на дарала сине.

Лескоро дад хем лескири дај панда таро тикнипа сикавена ле сине те мангел е Јехова. Адава поможинѓа е Давиде те на дарал чак кеда ка овен страшна буќа. Ов џанља кај о Јехова тано лескоро амал хем кај секогаш ка поможинел ле. Јекх пути, џикоте аракхела сине е бакхрен, јекх баро лави ало хем астарѓа јекхе бакхре! Џанеа ли со керѓа о Давид? Прастандило пало лави хем мударѓа ле пе дује вастенцар! Јавер пути, кеда јекх мечка мангља те хал јекхе бакхре, о Давид мударѓа ла! Со мислинеа, кој поможинѓа е Давиде?— Оја, о Јехова.

Ки јекх јавер прилика, о Давид панда јекх пути сикавѓа кај тано бут храбро. О Израелција сине ки војна јекхе народоја — о Филистејција. Јекх Филистејцо сине бут, бут учо мануш, џини! Лескоро анав сине Голијат. Ов асала сине е Израелцонге хем е Јеховаске. О Голијат мангела сине ола те марен пе леа. Ама, са о Израелција дарана сине. Кеда о Давид шунѓа адава, ов вакерѓа леске: ‚Ме ка марав ман туја! О Јехова ка поможинел ман, хем ка побединав ту!‘ Со мислинеа, сине ли храбро о Давид?— Оја, бут сине храбро. Џанеа ли со уло пало адава?

О Давид леља шело хем панџ бара, хем гело те марел пе леа. Кеда о Голијат дикхља кобор терно сине о Давид, леља те асал леске. Ама, о Давид вакерѓа леске: ‚Ту авеа манге мачеа, а ме авава туке е Јеховаскере анавеа!‘ Тогаш прастандор, е шелеа вртинѓа о бар хем фрдинѓа ле право ки лесте. О бар кхувѓа ле право ко чекат! О Голијат пело ки пхув хем муло! Кеда дикхле  адава о Филистејција дарандиле хем нашле. Сар шај сине јекх терно чхаво сар о Давид те побединел е Голијате?— О Јехова поможинѓа ле, о Јехова сине бут посилно таро Голијат!

Со шај те сикљове таро Давид?— Нијекх нане посилно таро Јехова. А о Јехова тано то амал. Адалеске, јавер пути кеда ка дара, сетин ту, о Јехова ка поможинел ту те ове храбро!