Σο κερέσα όταν νταρέσα;​— Μπορεί τι τθάβντεσα τι νταγιάτε ντα τι νταντέστε για τι βοηθίνεν-τουτ. Όμως, κάποιος γιαβέρ-ντα μπορίνελα τι βοηθίνελ-τουτ. Βοβ ισί πιο ζουρανό σαριλένταρ. Τζανέσα κον ισί;​— Μπράβο, ο Ιεχωβά Ντεβέλ. Για τι σικλιάς σο βακερέλα η Αγία Γραφή εκχέ τερνέ τσσαβέσκε, σο βακερένας λέσκε Δαβίδ. Ο Δαβίδ τζανέλας ότι ο Ιεχωβά κα βοηθίνελας-λες πάντα, ντα να νταρέλας.

Χουρντιαρέλα μπερί, λέσκο ντατ ντα λέσκι ντάι σικλιαρντέ-λες τι μανγκέλ ι Ιεχωβάς. Οτθάρ, να νταρέλας ατζέ-ντα όταν αβένας-πες μπέτι πράγματα. Τζανέλας ότι ο Ιεχωβά ισινέ λέσκο Αμάλ ντα κα βοηθίνελας-λες. Εκ φαρ, σαρ αρακχαβέλας πι μπρακέν, αβιλό εκ μπαρό λιοντάρι ντα καπτιντάς πι μόσαρ εκχέ μπρακές! Τζανέσα σο κερντάς ο Δαβίδ; Κυνηγιντάς ι λιονταρίς ντα, μάλλον, μουνταρντάς-λες πι βαστέντζαρ! Ντα όταν γκιλί εκ αρκούδα τι χαλ ι μπρακέν, μουνταρντάς εμ λα! Κον αμντίνεσα ότι βοηθιντάς-λες;​— Αγαντάν-λες, ο Ιεχωβά.

Εκ γιαβέρ-ντα φαρ, ο Δαβίδ σικαντάς ότι να νταρέλας. Ο Ισραηλίτες πολεμίνενας εκχέ λαόσαρ σο βακέρντιβελας Φιλισταίοι. Εκ Φιλισταίος στρατιώτης ισινέ αζόμ βουτσσό σο μοιάζελας μπαγιά σαρ γίγαντας! Βακερένας λέσκε Γολιάθ. Ο γίγαντας πρασάλας ι Ισραηλιτέν ντα ι Ιεχωβάς. Βακερέλας κο Ισραηλίτες τι νικιόν τι πολεμίνεν-λες. Σαρέ, όμως, ιζράνας λέσταρ. Όταν ασουντάς-λες ανταβά ο Δαβίδ, βακερντάς λέσκε: “Με κα τσσουβάβ-λεν τούσαρ! Ο Ιεχωβά κα βοηθίνελ-μαν, ντα κα νικίναβ-τουτ!” Πακιάσα ότι ο Δαβίδ νταρέλας;​— Όχι να νταρέλας, ισινέ μπι-νταρανό. Μανγκέσα τι σικλιός σο αβιλό σοράν;

Ο Δαβίδ λιντάς πι σφεντόνα ντα παντς μπαρά, ντα γκιλό τι τσσουβέλ-λεν ι γιγαντάσαρ. Όταν ο Γολιάθ ντικχλάς καζόμ χουρντό ισινέ, πρασαντάς-λες. Αλλά ο Δαβίδ βακερντάς λέσκε: “Τούι αβέσα μάντε με σπαθίς, αλλά με αβάβα τούτε ι Ιεχωβάσκε ναβέσαρ!” Σοράν, τσσουντάς εκ μπαρ πι σφεντονάτε, τθαβντισάλο ντα φουρτιντάς-λες λέσκε. Ο μπαρ ντινάς-λες κο τσικάτ ντα ο γίγαντας μουλό! Ο Φιλισταίοι νταρασάλε αζόμ μπουτ σο νασλέ  σουγκό τθαβντιμάσαρ. Σαρ μπορισάλο ο Δαβίδ, εκ χουρντό τσσαβό, τι νικίνελ εκχέ ασακέ γιγαντάς;​— Βοηθιντάς-λες ο Ιεχωβά, σο ισινέ μπουτ πιο ζουρανό κατά γίγαντας!

Σο σικλιόσα κατά ιστορία του Δαβίδ;​— Ο Ιεχωβά ισί πιο ζουρανό σαριλένταρ ντα ισί το Αμάλ. Άρα, ι γιαβέρ φαρ σο κα νταρές, ντε-τουτ γκοντί ότι ο Ιεχωβά μπορίνελα τι βοηθίνελ-τουτ μα τι νταρές!