So keres, kana daras kathar variso? (. . .) Kothe zhas kaj tyo dad vaj kaj tyi dej te zhutin tuke. Gindisar andre, inke varikon si, kon zhanel te zhutil tuke. Voj si o legmaj zuralo. Zhanes, kon si voj? (. . .) Ova, o Jehova Del. Akanak vorbinas pal o terno David. Pa leste ande Biblia shaj ginavas. Voj chi darajlas, ke zhanglas, hoj o Jehova zhutil leske.

Kana o David cino shavoro sas, lesko dad thaj leski dej sityarde les pal o Jehova. Anda kadi o David chi darel kathar khanchi, so pecil pe leste. Zhanglas, o Jehova lesko amal si, thaj zhutil leske. Jekhar, kana o David sama le las pe bakre, jekh baro oroszláno ingerdas le bakres. So gindines, so kerdas o David? Pala leste gelas, thaj mudardas les, peske duje vastenca. Pala kado e medve – jekh kaver vadno állatura – gelas pe bakre, de o David mudardas vi les. So gindines, kon zhutindas le Davideske? (. . .) Ova, o Jehova zhutindas les.

O David butivar tromako sas. Le izraeliti thaj la filisteusha kethane mardine pe. Jekh filisteushi ketana ucho thaj zuralo sas. Voj sas o Goliat. Kado oriashi avri assajlas le izraeliti ketanen thaj le Jehovas. Akhardas le ketanen te maren pe lesa. De khonyik nas kasavo tromako. Sakono darajlas. Kana o David shundas le Goliates, kodo phendas: „Marav ma tusa! Tele marav tut, ke o Jehova zhutil man.” So gindines, o David tromako sas? (. . .) Ova, kodo sas. Kames te zhanes, so pecisajlas pala kado?

O David las peski parittya, thaj panzh barra, pala kodo gelas po Goliat te marel les. Kana o Goliat dikhlas le terne Davides, avri assajlas les. De o David kadi phendas: „Tu aves mande sablyasa, de me le Jehovasa som.” Atunchi las jekh barr thaj andre shutas ande parittya. Nashlas kaj o Goliat, thaj vorta karing leste shudas o barr. O barr ande  Goliatesko chikat gelas. O Goliat mulas. Le filisteusha kade darajle, hoj nashletar. Sar zhanglas o David te marel le Goliates? (. . .) O Jehova zhutisardas leske, thaj voj maj zuralo sas, sar o Goliat.

So shaj sityos andar le Davidesko trajo? (. . .) O Jehova si o legmajbaro. Voj si tyiro amal. Thaj varikana kana daras, te avel ande tyi godyi, hoj o Jehova zhutil, te aves tromako.