Tongana mbeto asara mo, mo yeke sara ka nyen?— Peut-être mo yeke kpe na mbage ti babâ wala mama ti tene ala mû maboko na mo. Me mbeni zo ayeke dä nga so alingbi ti mû maboko na mo. Lo yeke ngangu ahon tanga ti azo kue. Zo ni so ayeke zo wa?— Ni la, a yeke Jéhovah Nzapa. Zia e bâ tënë ti mbeni molenge-koli so Bible airi lo David. David ahinga lani so Jéhovah ayeke mû lakue maboko na lo, ni la lo yeke sara ka mbeto ape.

Depuis kete ti lo la si babâ na mama ti David ayeke fa na David ni ti ye Jéhovah. A sara si tongana mbeni ngangu ye asi na lo, lo sara mbeto ape. Na lo, Jéhovah ayeke kamarade ti lo nga lo yeke nduru ti mû maboko na lo. Mbeni lâ, tongana David angbâ ti bata ataba ti lo, mbeni kota bamara aga azi yanga ti lo amû mbeni taba oko ahon na ni. Mo hinga ye so David asara? Lo tomba peko ti bamara ni si lo fâ lo gi na maboko ti lo senge. Nga, tongana mbeni sioni nyama so a iri lo ours aga nga ti te ataba ti lo, David afâ lo kue. Mo pensé zo wa la amû ngangu ni na David ti fâ anyama so?— Biani, a yeke Jéhovah.

Mbeni lâ nga, David asara mbeni ye so afa atene lo yeke na mbeto ape. Na tango ni so, azo ti Israël ayeke tiri na aturugu ti aPhilistin. Mbeni oko ti aturugu ti aPhilistin ni ayo sioni! Iri ti lo ayeke Goliath. Yongoro turugu so ayeke he aturugu ti Israël nga na Jéhovah. Lo tene na aturugu ti Israël, lo tene tongana ala yeke ngangu, ala ga atiri na lo. Me mbeto ahon ndo ti aturugu ti Israël ni si ala tiri na lo ape. Tongana David ama tënë ni, lo tene na Goliath: ‘Mbi yeke tiri na mo! na Jéhovah ayeke mû maboko na mbi, nga mbi yeke fâ mo.’ David ayeke zo ti mbeto ge?— Lo yeke zo ti mbeto ape. Mo ye ti hinga ye so asi na pekoni?

David amû lance ti lo nga na atênë oku so tere ni aza zango. Lo gue ti tiri na yongoro turugu ni. Tongana Goliath abâ so kete molenge la aga ti tiri na lo so, lo he lo ngangu. Me David atene na lo: ‘Mo ga na mbi na épée; me mbi, mbi gue na mo na iri ti Jéhovah.’ Tongaso, lo mû mbeni tênë ni oko, lo kanga ni na yâ ti lance ti lo, lo turnê ni vun! vun! vun! lo mû loro lo gue na mbage ti Goliath, si lo bi ni. Tênë ni  ague droit apika devant ti li ti Goliath, si lo tï na sese, lo kui. Mbeto agbu aPhilistin ni si ala kue akpe. Tene na mbi, zo wa la asara si tâ kete molenge tongana David afâ yongoro turugu so?— Jéhovah la amû maboko na lo, lo yeke ngangu ahon yongoro turugu so mingi.

Mo yeke sara tongana nyen ti fa so mo sara ye tongana David?— Jéhovah ayeke ngangu mingi ahon azo kue. Lo yeke nga Kamarade ti mo. Ni la, ti peko, tongana mbeto asara mo, hinga so Jéhovah alingbi ti sara si mo hon ndo ti mbeto ni.