WOTO 6
Dafiti an bi ta fëëë
Andi i ta du te i ta fëëë?— Kandë i nango a i mama ku i tata u de heepi i. Ma wan woto sëmbë dë di sa heepi i tu. A taanga möön hii sëmbë. I sabi ambë dëën u?— Hën da Jehovah Gadu. Boo luku di woto u di njönku kijoo de kai Dafiti, di dë u feni a Bëibel. Dafiti sabi taa hii juu Jehovah bi o sa heepi ën, nöö fëën mbei an bi ta fëëë.
Sensi di Dafiti bi dë piki mii, hën dee gaan sëmbë fëën bi lei ën taa a musu lobi Jehovah. Di soni aki heepi Dafiti fu an fëëë, aluwasi un hogi bi ta ko miti ën. A bi sabi taa Jehovah bi dë hën mati, nöö a bi o heepi ën. Wan daka di Dafiti bi ta luku sikapu, hën wan gaan lëun kisi wan u dee sikapu fëën ta tja go. I saandi Dafiti du ö? A kule a di lëun baka, hën a naki ën kii! Söseei di di hogi mbeti de kai beer bi ta ko kii wan u dee sikapu fëën, hën a kii di beer tu! Ambë i si kuma bi heepi Dafiti?— Awa, Jehovah hën bi heepi ën.
Di dee Isaëli sëmbë bi ta feti ku dee Filisiti sëmbë, hën Dafiti bi lei taa a bi abi degihati tu. Wan u dee Filisiti sodati de kai Goliati, bi dë wan gaan djanga womi! A bi ta sösö dee sodati u Isaëli, nöö a ta mbei Jehovah fa. Goliati bi ta kai dee sodati u Isaëli u de ko feti ku ën. Ma na wan u dee sodati u Isaëli bi abi degihati u ko feti ku ën. Di Dafiti jei di soni aki, hën a piki Goliati taa: ’Mi o feti ku i, Jehovah o heepi mi, nöö mi o wini i! I si kuma Dafiti bi ta fëëë u?— Nönö, an bi ta fëëë. I kë sabi andi pasa baka di dë u?
Dafiti tei hën abalëti ku feifi linzolinzo sitonu, hën a go feti ku di gaan djanga womi aki. Di Goliati bi si taa Dafiti njönku seei, hën a ta mbei ën fa. Ma Dafiti piki ën taa: ’I ta ko a mi ku wan feti ufangi, ma mii ta ko a i a di në u Jehovah.’ Hën a buta wan sitonu a di abalëti fëën, hën a vindëën ku hii hën kaakiti viiin te a Goliati mindifesi! Hën wë Goliati kai a goon, dëdë piii! Hën dee Filisiti sëmbë ko fëëë seei, hën de kule go. Unfa sö wan njönku kijoo bi sa kii sö wan gaan djanga womi?— Wë u di Jehovah bi heepi ën, nöö Jehovah bi taanga gaanfa möön di gaan djanga womi dë!
Dafiti an bi ta fëëë, biga a bi sabi taa Jehovah bi o heepi ën
Andi u sa lei a di woto u Dafiti?— U ta lei taa na wan sëmbë dë di taanga möön Jehovah, nöö hën da i Mati. Wë wan woto pasi ee wan soni mbei i fëëë möön, nöö hoi a pakisei taa Jehovah sa heepi i fii abi degihati!
