Apa koatengu mạeng i kau matakụ?— I kau tantu mědeạ si papạ arau si mamạ u. Katewe piạ lai botonge mẹ̌tul᷊ung si kau. I Sie lebe matoghasẹ̌ bọu kěbị taumata. I kau masingkạ i sai i Sie?— Iya, i Sie kai Mawu Yehuwa. Mahi i kitẹ mẹ̌basa su Alkitapẹ̌, běke anạ mangudạ arenge i Daud. I sie masingkạ Yehuwa turusẹ̌ mẹ̌tul᷊ung si sie, hakị u ene i sie tawe matatakụ.

Su tempong i Daud bědang kadodọ, i papạ dingangi mamạ e něněntiro si sie tadeạu makěndagẹ̌ si Yehuwa. Hakị u ene mạeng piạ barang makatatakụ nariadi, i Daud tawe matakụ. I sie masingkạ Yehuwa ene kai hapịe, kụ Yehuwa lai mẹ̌tul᷊ung si sie. Piạ su sahěllo, i Daud něndiagạ domba-domba, kụ piạ singa gěguwạ něngal᷊ạ sěmbaụ domba, bọu ene timal᷊ang! I kau masingkạ apa nikoạ i Daud? I sie něnahusu singa ene, nisamẹ e, kụ nipapate! Bọu ene lai piạ beruang něngal᷊ạ domba, kụ beruang ene lai nipate karạ i Daud! I kau masingkạ, kawe i Daud nakoạ bahani?— Iya, ual᷊ingu Yehuwa nẹ̌tul᷊ung si sie.

Piạ su sahěllo, tau Israel nẹ̌perang dingangu tau Pilistin. Sene i Daud něnodẹ i sie tawe matatakụ. Piạ tentara Pilistin badange gěguwạ-guwạ, i sie raksasa! Arenge Goliat. Raksasa ene nělangehẹ̌ tentarang Israel dingangi Yehuwa. Goliat němaringang tentara Israel mẹ̌kakoka dingange. Katewe kěbị tau Israel natakụ si sie. Su tempong i Daud nakaringihẹ̌ ene, i sie nẹ̌bera si Goliat: ’Iạ mělawang si kau! Yehuwa sarung mẹ̌tul᷊ung si siạ, i kau sarung mawaụ!’ Mạeng si kau kerea, apa i Daud bahani?— Iya, i sie bahani. Bọu ene apa nariadi?

Daud něngal᷊ạ katipolẹ̌ dingangu limambaụ batu bọu sal᷊ụ, kụ nakoạ sarang raksasa ene. Goliat nělangehẹ̌ si Daud ual᷊ingu i Daud bědang mangudạ. Katewe i Daud nẹ̌bera si sie: ’i kau diměnta si siạ dingangu peda, katewe iạ duměnta si kau dingangu areng i Yehuwa!’ Bọu ene i Daud něngal᷊ạ batu nitaho su katipolẹ̌, kụ apidu kạtal᷊ange sarang i Goliat, nikatipolẹ̌ e i sie. Batu ene nihino su rěhụ e! Raksasa ene nahaka, i sie  nate! Tentarang Pilistin natakụ, kụ i sire timal᷊ang. Kawe raksasa ene nawaụ su anạ mangudạ kere i Daud?— Ual᷊ingu Yehuwa nẹ̌tul᷊ung si Daud. Yehuwa lebe matoghasẹ̌ bọu raksasa ene.

Běke ini něněntiro apa si kau?— Yehuwa lebe matoghasẹ̌ bọu kěbị taumata. I Sie lai hapị u. Hakị u ene pẹ̌tahěndung wue, su tempong i kau matakụ, Yehuwa sarung mẹ̌tul᷊ung si kau makoạ bahani!