Inogne ty atao’o naho fa matahotse?... Va’e hirehake amy i Baba naho i Nene rehe hagnampe azo. Mbe misy hafa ka hagnampe azo sady ambone ty hery o ndatio ty heri’e. Ia hao naho fanta’o?... I Jehovah Andrianagnahare. Andao tikagne hirehake miomba ty ajaja raike atao tihoeke Davida. Agnate Baiboly ao ty agnara’e. Fanta’e fa hagnampe aze ty Jehovah, le izay ty nahavy aze tsy natahotse.

Fa nampianaren-drae’e naho i rene’e ho tea i Jehovah ty Davida tamy tie mbe niajaja. Izay ty nagnampe aze tsy natahotse ndra tie nisy raha natahoragne. Fanta’e fa hagnampe aze ty Jehovah fa Mpiragnetse iareo. Niarake agnondry reke tamy tie indraike. Nisy liona jabajaba nangalake ty raike amy i agnondri’ey. Inogne ty natao i Davida? Niheagne’e i lionay, le vinono’e. Ie amy izao tsy managne fialiagne. Vinono’e ka i fosay fa nitsibore i agnondri’ey. Ia ty nagnampe i Davida naho fanta’o?... I Jehovah.

Nisy andro ka nahatreavagne fa tsy natahotahotse ty Davida. Nialy o Isiraelitao naho o Filisitina zao. Nanagne maramila bey naho abo o Filisitinao. I Goliata ty agnara’e. Nagnaratiraty i Jehovah naho ty maramila isiraelita reke. Nitaone’e hialy ama’e i maramila isiraelita rey faie natahotse aze. Naho fa nirey i Davida zay, le nirehake tamy i Goliata reke tie: ‘Hialy ama’o raho kahe! Hagnampe ahy ty Jehovah, le ho reseko rehe!’ Tsy natahotse vao ty Davida naho fanta’o?... Eka. Vata’e tsy natahotse reke. Fanta’o vao ty raha niseho tafara izay?

Nangalake piletse naho vato bory dime ty Davida fa handeha hialy amy ndaty jabajabay. Nivazà i Goliata ty Davida fa mbe ajaja. Nirehake tama’e ty Davida tie: ‘Ihe hialy amako minday mesabey, fa izaho minday ty tahina i Jehovah!’ Naombe’e amy i piletsey ty vato raike, le nilay mbamy i Goliata mbeo reke. Pinile’e amy izay ty Goliata le nivoa amy ty ­pelahandri’e. Nitonta reke, le nimate. Natahotse i Filisitina rey, le nilay iaby. Nagnino ie nahafate ndaty jabajaba ty hanak’ajalahy i Davidao?... Nampea i Jehovah reke. Fa i Jehovah ty maozatse tie amy i ndaty jabajabay.

Inogne ty ianara’o amy ty tantara i Davida?... Ambone ty hery o ndatio ty hery i Jehovah. Ragne’o ka reke. Naho fa agne ty andro mampatahotse azo, le ko haligno fa hagnampe azo tsy hatahotse ty Jehovah.