Inyoin bo kiswamai ijo arai kijaatar akuriau?— Katicepak ipedori ijo alosit nejai toto araibo papa kon. Konye ejai bobo ice tunganan yen epedori aingarakin ijo. Erai nges lo egogong noi adepar idio tunganan kere. Ijo ijeni nges?— Eebo, erai nges Edeke Yawe. Aso kenerata nuikamunitos etunganan loedit kotoma Obaibuli lo enyaritai Daudi. Ajeni ebe ebuni Yawe aingaranakin nges duc, mam do nges arai lo akuriana.

Ageun apak narokor nges arai ikoku, apotu ikeuriak kisisianakisi nges amin Yawe. Nu kesi apotu kingarakisi Daudi araun lomam ekuriana karaida eterekin nges kede iboro luitukurianete. Ajeni nges ebe erai Yawe opaperoke ido ebe ebuni aingarakin nges. Adiope pak, naajar Daudi acok amerekekin, abu engatuny kobu kosodi aikamar imerekek! Kijeni ijo nuabu Daudi kiswama? Abu korukia engatuny kosodi aiyar kakekanin! Kosodi bobo nasurokina adubu amerekekin, abu Daudi koara ngin da. Ingai bo iwomit ijo abu kingarak Daudi?— Eebo arai Yawe.

Ajai bobo ace pak nearar Daudi loatiting. Ajiosi Isirailin keda itunga lu anyaritai Ipilistin. Ediopet kotoma okiarin kec arai etunganan loawojan noi, lokos! Arai ekekiror Goliat. Akwenar etunganan lokos lo Isirailin keda Yawe. Abu Goliat otereikin kede Isirikale luka Isirael abunere aitiji nges. Konye akuriaka Isirailin kere ejie keda nges. Ne apupunia Daudi kwagin, abu kolimok Goliat: ‘Abuni eong atiji ijo! Ingarakini eong Yawe, aitelekar ijo!’ Kiwomit ijo ebe atiting Daudi?— Eebo, atiting. Ikoto ijo ajenun nuapotu kotupakisi?

Abu Daudi kolem akeporocet keda alica akany nuerurut, kosodi alosit aitiji etunganan lokos. Ne aanyunia Goliat eipone lo adisiar Daudi, abu kokwenar Daudi. Konye abu Daudi kolimok nges ebe: ‘Kibuni ijo neajai eong kekileng, konye eong abuni neijai ijo kokiror Loka Yawe!’ Kosodi nges aibuaikin alicait aporocet ke, koker neajai Goliat, koporoca alicait kideresit kitoni nejai Goliat. Abu alicait kolot ederesitoi kiton orete ke. Kibirokin etunganan lokos  kwap, katwanare! Kodumutu Ipilistin akuriau kosodete kere aibelokin akerit. Eipone bo ani apedoria ikoku kwape Daudi aitelekar etunganan lokos?— Yawe nges abu kingarak, naarai agogong Yawe noi adepar etunganan ngol lokos!

Nuinyoika kisisauni oni kanejai awaragat ke Daudi?— Erai Yawe loegogong adepar idio tunganan kere. Ido erai nges Opapero kon. Aso neidumunia ijo akuriau, kiitu ebe, epedori Yawe aingarakin ijo araute loititing!