Kwagh ka una cier we iyol nahan, u er nena?— Shighe ugen ka u yevese u za ta ken mama gayô baba. Orgen kpa ngu u nana fatyô u wasen we yô. Or la hemba hanma or cii agee. U fa or shon kpa?— Een, ka Yehova Aôndo. De se ôr kwagh u wanye ugen ken Bibilo, u i yilan un ér Davidi yô. Davidi yange fa ér Yehova una wase un hanma shighe cii, nahan kwagh cier un iyol ga.

Shighe u Davidi lu ankyundan la je, mbamaren nav tese un u yan ijende a Yehova. Kwagh la wase Davidi kera luun a mciem sha kwagh ga, akaa a cier iyol aa er je kpa i cier un iyol ga. Yange fa ér Yehova ka Ijende na shi Una wase un. Kwagen la, Davidi lu kuran ilev ken toho, maa zege begha va kôr iyôngo, nyima sha zwa lu yemen a mi! U fa kwagh u Davidi er kpa? Davidi cir a begha la, man ikyav tese ér yange za wua begha shon sha ave! Shighe ugen la di lu dwem va kôr iyôngo ye. Dwem la kpa Davidi wua un! U hen wer ka an yange nan wase Davidi?—Een, ka Yehova.

Shighe ugen ngu u Davidi yange tese ér un cie kwagh ga dedoo yô. Mbaiserael lu nôngon ityav a ior mba i yilan ve ér Mbafiliti la. Orshoja u Mbafiliti ugen tav gôgônan, shi kehe je cier iyol! I yilan un ér Goliati. Gbogbo-or ne lu lahan ushoja mba Iserael kuan Yehova sha mi. Goliati kaa ér orshoja u ken Mbaiserael u nan cian kwagh ga yô, nana cihi a va nôngo ityav a na. Kpa ushoja mba ken Iserael cii lu cian un. Davidi ongo nahan yô, a kaa a Goliati ér: ‘Mo me nôngo ityav a we! Yehova una wasem, me hemba u!’ U nenge wer Davidi yange taver ishimaa?— Een, yange taver ishima dedoo. U fa kwagh u yange za hemen kpa?

Davidi tôô mzu na kua awen ataan, yem u za nôngon ityav a gbogbo-or la. Goliati nengen ér Davidi ka wanye yô, a gba sen un. Kpa Davidi kaa a na ér: ‘U ngu van her a mo a sanker, kpa mo m va u nôngon ityav a we ken iti i Yehova!’ Davidi maa wa iwen ken mzu na, yevese za sha Goliati, za ker iwen la sha na jighilii. Iwen la due za ta Galiati sha icul jigh jigh! Gbogbo-or la maa yem gbidye inya, kpe her je! Yange  cier Mbafiliti iyol gande, ve yevese ve yem. Er nan ve wanye er Davidi nahan hemba gbogbo-or ityava?— Yehova yange wase un, sha ci u Yehova hemba gbogbo-or la agee ica je!