He ā tā koe e fai kafai koe e mataku?​— Hōvē e fano koe ki o mātua mo he fehoahoani. Kae e i ei foki te tahi tino e mafai oi fehoahoani atu. E hili atu tona malohi i lō he tahi tino. E kē iloa pe ko ai?⁠​—⁠ Io, ko Ieova te Atua. Tatou talanoa e uiga ki he talavou i te Tuhi Paia, ko Tavita ko tona igoa. Na ia iloa ko Ieova e fehoahoani ki a te ia, tēia na hē mataku ai ia.

I te taimi na fānau ai ia Tavita, na akoako e ona mātua ke alofa ki a Ieova. Na fehoahoani ki a Tavita ke nahe popole ki ni mea matakutia e tupu ki a te ia. Na iloa e ia ko Ieova ko tana Uō ka fehoahoani atu ki a te ia. I he taimi na tauhi ai e Tavita ni mamoe, na ohofaki he mamoe e he leona! E kē iloa te mea na fai e Tavita? Na tuli e ia te leona ma tamate i ona lima! I te taimi na ohofaki ai nā mamoe e he pea, na tamate foki e Tavita! He ā tō manatu, ko ai tē na fehoahoani ki a Tavita?⁠— Io, ko Ieova.

Nae i ei he tahi taimi na matuā lotomakeke ai ia Tavita. Nae tau nā Ihalaelu ma ni tino e takua ko ni Filihitia. Ko he tahi fitafita Filihitia nae loa lele, he mātuā tino! Ko Koliata tona igoa. Na faileka te mātuā tino tēnei ki nā fitafita a Ieova. Na luki e Koliata nā tino Ihalaelu ke tau ma ia. I te iloaga e Tavita, na lea atu ia vēia ki a Koliata: ‘Ko au ka tau ma koe! Kae e fehoahoani mai Ieova ke manumalo au!’ He ā tō manatu na lotomakeke ia Tavita?​— Io, na matuā lotomakeke. E kē iloa te mea na tupu?

Na kave e Tavita tana mā tā ma ni fatu e lima, ma fano oi tau ma Koliata. I te kiteaga e Koliata te talavou ko Tavita, na taufakalili ai ia ki a Tavita. Kae na lea ki ei ia Tavita: ‘E hau koe ma te pelu, kae ko au e fanatu ma te igoa o Ieova!’ Ma tuku ai e ia he fatu ki tana mā tā, vili ma togi ia Koliata. Ko te fatu na tautonu ki te vā o nā mata o Koliata! Pakū ia Koliata ki lalo,  kua oti! Kua mātataku nei te kau Filihitia ma hohola kehe ai. Na mafai vēhea ke manumalo he tama e vē ko Tavita ia Koliata?​— Na fehoahoani ia Ieova ki a te ia, ma hili atu te malohi o Ieova i lō Koliata!

He ā he akoakoga e kē maua mai te tala o Tavita?​— E hili atu te malohi o Ieova i lō he tahi tino. Ko ia foki ko tau Uō. Manatua kāfai ko koe e toe mataku, e mafai oi fehoahoani atu ia Ieova ke lotomakeke koe!