Ko e hā ho‘o me‘a te ke fai ‘i he taimi ‘okú ke ilifia aí?— Mahalo pē te ke ‘alu kia mami mo teti ki ha tokoni. Ka ‘oku toe ‘i ai ‘a e tokotaha ‘e lava ke ne tokoni‘i koe. ‘Oku mālohi ange ia ‘i ha toe taha pē. ‘Okú ke ‘ilo‘i ko hai ia?— ‘Io, ko Sihova ko e ‘Otuá. Tau lāulea angé ki ha ki‘i talavou ‘i he Tohi Tapú ko hono hingoá ko Tēvita. Na‘á ne ‘ilo‘i ‘e tokoni‘i ma‘u pē ia ‘e Sihova, ko ia ai na‘e ‘ikai ke ne ilifia.

‘I he taimi na‘e kei pēpē ai ‘a Tēvitá, na‘e ako‘i ia ‘e he‘ene ongo mātu‘á ke ‘ofa kia Sihova. Na‘e tokoni eni kia Tēvita ke ‘oua ‘e ilifia na‘a mo e taimi na‘e hoko ai kiate ia ha ngaahi me‘a fakailifiá. Na‘á ne ‘ilo‘i ko Sihova na‘e hoko ko hono Kaume‘a pea te Ne tokoni‘i ia. ‘I he taimi ‘e taha, na‘e tokanga‘i ai ‘e Tēvita ‘a e fanga sipí, na‘e ha‘u ai ha fu‘u laione ‘o ‘ūtaki ‘a e sipí! ‘Okú ke ‘ilo ‘a e me‘a na‘e fai ‘e Tēvitá? Na‘á ne tuli ‘a e laioné pea ngalingali na‘á ne tāmate‘i ia ‘aki hono ongo nimá! Pea hili iá ‘i he taimi na‘e ‘ohofi ai ‘e ha pea ‘a e fanga sipí na‘e toe tāmate‘i ia ‘e Tēvita! ‘Okú ke fakakaukau ko hai na‘á ne tokoni‘i ‘a Tēvitá?— ‘Io, ko Sihova.

Na‘e toe ‘i ai ha taimi na‘e makehe ange ai ‘a e to‘a ‘a Tēvitá. Ko e kau ‘Isilelí na‘a nau tau mo e kakai na‘e ui ko e kau Filisitia. Ko e taha ‘i he kau sōtia Filisitiá ko ha fu‘u tangata lōloa, ko ha saianiti! Ko hono hingoá ko Kolaiate. Na‘e fakakata‘aki ‘e he saianiti ko ení ‘a e kau sōtia ‘Isilelí mo Sihova. Na‘e pole‘i ‘e Kolaiate ‘a e kau sōtia ‘Isilelí ke ō mai ke nau tau. Ka na‘e ilifia ‘aupito ‘a e kotoa ‘o e kau ‘Isilelí ke tau mo ia. ‘I he taimi na‘e fanongo ai ‘a Tēvita ki aí, na‘á ne tala ange kia Kolaiate: ‘Te u tau au mo koe! ‘E tokoni mai ‘a Sihova kiate au pea te u ikuna‘i koe!’ ‘Okú ke fakakaukau na‘e to‘a ‘a Tēvita?— ‘Io, na‘e to‘a ‘aupito. ‘Okú ke fie‘ilo ki he me‘a na‘e hokó?

Na‘e to‘o ‘e Tēvita ‘ene makataá mo e fo‘i maka molemole ‘e nima, pea na‘á ne ‘alu atu ke faitau mo e saianití. ‘I he taimi na‘e sio ai ‘a Kolaiate ki he ki‘i tamasi‘i ko Tēvitá, na‘á ne fakakata‘aki ‘a Tēvita. Ka na‘e tala ange ‘e Tēvita kiate ia: ‘‘Okú ke ha‘u kiate au mo e heletā, ka ‘oku ou ‘alu atu mo e huafa ‘o Sihová!’ Na‘á ne ‘ai leva  ha fo‘i maka ki he‘ene makataá, peá ne lele ‘o tukuange hangatonu atu ia kia Kolaiate. Na‘e tau ‘a e fo‘i maká ‘i he la‘e ‘o Kolaiaté! Na‘e tō ‘a e fu‘u saianití ki he kelekelé ‘o mate! Na‘e ilifia ‘aupito ‘a e kau Filisitiá pea nau hola kotoa. Na‘e lava fēfē ha ki‘i tamasi‘i hangē ko Tēvitá ke ne ikuna‘i ha fu‘u saianiti?— Na‘e tokoni‘i ia ‘e Sihova, pea ‘oku mālohi lahi ange ‘a Sihova ‘i he fu‘u saianiti ko iá!

Ko e hā ‘e lava ke ke ako mei he talanoa kia Tēvitá?— ‘Oku mālohi lahi ange ‘a Sihova ‘i ha toe taha pē. Pea ko ho Kaume‘á ia. Ko ia ai ‘i he taimi pē te ke ongo‘i ilifia aí, manatu‘i, ko Sihova te ne tokoni‘i koe ke ke hoko ‘o to‘a!