Kiki eky’okora obwoba otiinire?— Oirukira omwa maama waawe rundi taata waawe? Haliyo omuntu ondi arukusobora kukukonyera. Akira abantu boona amaani. Omumanyire?— Nuwe Yahwe Ruhanga. Katwege hali omwojo omu omu Baibuli ou beeta Daudi. Tiyatiinaga kintu kyoona habwokuba Yahwe yamukonyeraga buli kiro.

Bazaire ba Daudi bakamwegesa kugonza Yahwe kurugira kimu omu buto. Kinu kikamukonyera kutatiina gonze ayesangire omu mbeera erukutiinisa. Akaba akimanyire ngu Yahwe munywani we kandi ngu aija kumukonyera atungire ebizibu. Kiro kimu Daudi obwaakaba n’alisa entaama, entale ekaija y’atwara emu ha ntaama ze. Omanyire Daudi eki yakozere? Akagihondera y’agiita n’emikono ye! N’edubu obu yaizire kulya entaama, n’ayo akagiita. N’oteekereza noha ayabaire n’amukonyerera?— Akaba Yahwe.

Haroro omurundi ogundi Daudi ogu yayolekireho obumanzi. Abaisareri bakaba nibarwaana n’Abafirisiiti. Omu hali Abafirisiti abo gukaba guli gusaija gukooto muno kandi guraihire, bagwetaga Goliasi. Goliasi y’ajumaga Yahwe n’Abaisareri. Y’abasekerezaaga n’abagamba baije bamurwanise obu baraaba nibasobora. Baitu Abaisareri boona bamutiinaga. Daudi obu yakihuliire, akagamba Goliasi ngu: “Ninyija kukurwanisa!” Yahwe aija kunkonyera, kandi nja kukusingura. N’ogira Daudi eki yakozeere kikoleka obumanzi?— Hataroho kugurukyagurukya, kikaba ky’obumanzi. N’ogonza kumanya eky’ahondiireho?

Daudi akatwara omwesuuso gwe n’amabaale ataano ag’ekulingiriire kurungi, kurwanisa Goliasi. Goliasi akatandika kusekereza Daudi habwokuba akarora ali mwojo muto. Baitu Daudi akamugamba: ‘N’oija nambere ndi na busitama, baitu nyowe ninyija nambere  oli omw’ibara lya Ruhanga Yahwe.’ Omu kasumi ako akateeka ibaale limu omu mwesuuso gwe y’airuka n’airira Goliasi, y’alihungura lyamukwasa hagati omu buso bwe. Goliasi akagwa hansi yafa, Abafirisiti abandi boona obu bakirozere, batiina bairuka. Daudi omwojo muto, akasobora ata kwita Goliasi?— Yahwe arukukira Goliasi amaani nuwe yamukonyiire.

Oruganikyo rwa Daudi rutwegesa ki?— Rutwegesa ngu Yahwe akira abantu boona amaani. Yahwe munywani waawe, nahabwekyo kakuba oyesanga omu buzibu bwona, ijuka ngu Yahwe asobora kukukonyera.