Корга бергеш, чүнү канчаар-дыр сен?~ Ачаңче азы аваңче халып-ла каар боор сен. Ынчалза-даа делегейде кымдан-даа артык күштүг Дузалакчы бар. Оон дузаны дилеп болур сен. Ол кымыл, билир сен бе?~ Ол дээрге Иегова Бурган-дыр. Ам Давид деп аттыг аныяк оолдуң дугайында чугаалажып көрээлем. Ооң дугайында Библияда бижээн. Давид дидим чораан, чүге дээрге Иегова кезээде аңаа дузалаптар деп, ол билир турган.

Давидтиң ада-иези ону чажындан тура Иеговага ынак болур кылдыр өөредип чораан. Ол чүүл аңаа айыыл үезинде коргушту тиилээринге дузалап турган. Иегова — ооң Өңнүү, ынчангаш Ол аңаа дуза кадарынга кезээде белен деп, Давид билир турган. Бир-ле катап, Давид хой кадарып чорда, хенертен арзылаң халып келгеш, бир хойну сегирип алган! Давид чүнү канчапканыл, билир сен бе? Ол чепсек чок-даа бол, арзылаңче халдай бергеш, ону өлүрүп каан. Өске таварылгада хойларже адыг халдай берген. Давид ону база тиилеп каан. Чүү деп бодаар сен, Давидке кым дузалап турганыл?~ Ийе, шын-дыр, Иегова.

Бир катап Давид онзагай дидим чорукту көргүскен. Израильчилер филистимнер деп кожа чон-биле дайылдажы берген. Филистим дайынчыларның бирээзи аажок узун дурт-сынныг турган — ёзулуг күчүтен-не! Ооң адын Голиаф дээр. Ол израильчи дайынчыларны болгаш Иегованы кочулап турган. Голиаф израильчилерни тулчуушкунче кыйгырарга, олар оон коргуп турган. Давид ол дугайын дыңнап кааш, Голиафка: «Мен сээң-биле тулчур мен! Сени тиилептер кылдыр, Иегова меңээ дузалаар!» — деп чугаалаан. Давид дидим турган бе, чүү деп бодаар сен?~ Ийе. Ооң соонда чүү болганыл, билир сен бе?

Давид даш октаар хөм баг биле беш хоюг даш ап алгаш, күчүтенге удур үнүпкен. Кажан Голиаф Давидтиң аныяан көргеш, ону кыжырып эгелээн. Ынчалза-даа Давид аңаа: «Сен меңээ удур хылыштыг кел чор сен, а мен сеңээ удур Иегованың ады-биле бар чор мен!» — деп чугаалаан. Давид Голиафка удур халып үнгеш, дажын хөм баанче салгаш, күчүтенче шывадаптарга, ол ооң хаваанга  барып дегген! Ол черже өлүг кээп дүшкен! Филистимнер ону көргеш, кортканындан дезипкеннер. Элээди Давид күчүтенни канчап тиилеп шыдааныл?~ Аңаа күчүтенден-даа оранчок күштүг Иегова дузалаан!

Давидтиң дугайында болуушкундан чүнү өөренип ап болур бис?~ Иеговадан артык күштүг кым-даа чок. А ол сээң Өңнүүң-дүр. Ынчангаш сеңээ кажан-бир коргунчуг апаар болза, Иегова сеңээ дидим болурунга дузалаар!