سىز قورققان چاغدا نېمە قىلىسىز؟‏ –‏ بەلكىم،‏ ئاپىڭىز ياكى دادىڭىزدىن بېرىپ،‏ ياردەم سورايسىز.‏ لېكىن سىزگە ياردەم بېرەلەيدىغان يەنە بىر شەخس بار.‏ ئۇ ھەممىدىن كۈچلۈك.‏ ئۇنىڭ كىم ئىكەنلىكىنى بىلەمسىز؟‏ –‏ توغرا،‏ ئۇ —‏ يەھۋا خۇدا.‏ كېلىڭ،‏ مۇقەددەس كىتابتىكى داۋۇت ئىسىملىك بىر يىگىت توغرۇلۇق ئوقايلى.‏ يەھۋا خۇدا ئۇنىڭغا دائىم ياردەم بېرىدىغانلىقىنى بىلىپ،‏ ئۇ ھېچ نەرسىدىن قورقمىغان.‏

ئاتا-‏ئانىسى داۋۇتنى كىچىكىدىن يەھۋانى ياخشى كۆرۈشكە ئۆگەتكەن.‏ بۇ داۋۇتقا ھەتتا قورقۇنۇچلۇق ۋەزىيەتلەردىمۇ قورقماسلىققا ياردەم بەرگەن.‏ ئۇ يەھۋا خۇدا ئۇنىڭ دوستى بولۇپ،‏ ئۇنىڭغا ياردەم بېرىدىغانلىقىنى بىلگەن.‏ بىر كۈنى داۋۇت قوي بېقىۋاتقاندا،‏ يوغان شىر كېلىپ،‏ بىر قوينى ئېلىپ قېچىپتۇ.‏ داۋۇتنىڭ نېمە قىلغانلىقىنى بىلەمسىز؟‏ ئۇ شىرنىڭ كەينىدىن قوغلاپ،‏ گەرچە قولىدا قۇرال بولمىسىمۇ،‏ ئۇنى ئۆلتۈردى!‏ كېيىنكى قېتىم قويلارغا ئېيىق ھۇجۇم قىلغاندا،‏ داۋۇت ئۇنىمۇ ئۆلتۈردى!‏ قانداق ئويلايسىز،‏ داۋۇتقا كىم ياردەم بەردى؟‏ –‏ ئەلۋەتتە،‏ يەھۋا خۇدا.‏

داۋۇت ئاجايىپ باتۇرلۇق كۆرسەتكەن يەنە بىر ۋەزىيەت بولغان.‏ ئىسرائىل خەلقى فىلىستىيەلىكلەر دېگەن ئادەملەرگە قارشى ئۇرۇش قىلغان.‏ فىلىستىيەلىك ئەسكەرلەرنىڭ بىرى ناھايىتى ئېگىز،‏ يوغان ئادەم ئىدى!‏ ئۇنىڭ ئىسمى جوليات بولغان.‏ ئۇ ئىسرائىل خەلقىنى ۋە يەھۋا خۇدانى زاڭلىق قىلاتتى.‏ جوليات ئىسرائىل ئەسكەرلىرىنى ئۆزى بىلەن ئۇرۇش قىلىشقا چاقىردى.‏ لېكىن ئۇلارنىڭ ھەممىسى جوليات بىلەن ئۇرۇش قىلىشقا قورقاتتى.‏ داۋۇت بۇنى ئاڭلىغاندا،‏ جولياتقا:‏ «مەن سېنىڭ بىلەن ئۇرۇشىمەن!‏ يەھۋا خۇدا ماڭا ياردەم بېرىپ،‏ سېنى يېڭىۋالىمەن!‏»—‏ دىدى.‏ سىزچە،‏ داۋۇت باتۇر بولغانمۇ؟‏ –‏ ھە،‏ ئۇ ناھايىتى باتۇر بولغان.‏ ئاندىن كېيىن نېمە بولغانلىقىنى بىلىشنى خالامسىز؟‏

داۋۇت سالغىسىنى (‏بۇرۇنقى تاش ئېتىش قۇرالى)‏ ۋە بەش سىلىق تاشنى ئېلىپ،‏ جولياتقا قارشى چىقتى.‏ جوليات داۋۇتنىڭ ياشلا يىگىت ئىكەنلىكىنى كۆرۈپ،‏ ئۇنى زاڭلىق قىلدى.‏ لېكىن داۋۇت ئۇنىڭغا:‏ «سەن ماڭا قىلىچ بىلەن قارشى چىقساڭ،‏ مەن ساڭا يەھۋانىڭ ئىسمى بىلەن قارشى چىقىمەن!‏»—‏ دىدى.‏ ئاندىن كېيىن ئۇ سالغىسىغا تاش سالدى ۋە جولياتقا قاراپ يۈگرەپ،‏ تاشنى ئۇنىڭغا  قارىتىپ ئاتتى.‏ تاش دەل ئۇنىڭ پېشانىسىگە تەگدى!‏ بۇ غايەت يوغان ئادەم يەرگە يىقىلىپ ئۆلدى.‏ بۇنى كۆرگەن فىلىستىيەلىكلەر قورقۇپ،‏ قېچىپ كەتتى.‏ داۋۇت شۇنچىلىك ياش تۇرۇپ،‏ قانداقلارچە بۇ يوغان ئادەمنى يېڭىۋالدى؟‏ –‏ ئۇنىڭغا يەھۋا ياردەم بەردى.‏ چۈنكى يەھۋا بۇ يوغان ئادەمگە قارىغاندا كۈچلۈكرەك!‏

داۋۇتنىڭ مىسالىدىن قانداق ساۋاق ئالالايسىز؟‏ –‏ يەھۋا ھەممىدىن كۈچلۈكتۇر!‏ ھەمدە،‏ ئۇ سىزنىڭ دوستىڭىز.‏ بىرەر نەرسىدىن قورققان چاغدا،‏ يەھۋانىڭ سىزگە جاسارەتلىك بولۇشقا ياردەم بېرىدىغانلىقىنى ئۇنتۇماڭ!‏