Exeeni enipaka anyu okathi munoona anyu etthu yowoopiha?— Kinoona wira, nyuwo muntthimakela wa paapa anyu ni maama anyu. Masi ohaavo mutthu mukina oniwerya wookhaliheryani. Owo toowerya vanceene waavikana atthu otheene. Moomusuwela mutthu ene?— Aayo, ti Yehova Muluku. Nrowe nilavule sa mmiravo oniromoliwa mBiibiliyani aitthaniwa Davidi. Owo aanisuwela wira okathi wotheene aamukhaliheriwa ni Yehova; tivonto owo khawoova awanani awe.

Okhuma onamwane awe, anamuyari awe yaahimwiixuttiha omphenta Yehova. Eyo yaahimukhaliherya Davidi ohoova etthu, hata okathi wa mixankiho. Owo aahisuwela wira Yehova aari mpatthani awe ni aarowa omukhaliherya. Mwa ntakiheryo, vaavo Davidi aakhapelela awe ipwittipwitthi sa apapawe, aahirwa mwatto wala kharamu muulupale ni ovara epwittipwitthi emosa! Exeeni Davidi aapanke awe? Owo aahimoomola mwatto ole ni khumwiiva ni matata awe! Okathi mukina, vaavo havara aatuphenle awe epwittipwitthi, Davidi aahimwiiva! Ti pani aamukhaliherye Davidi?— Aayo, aari Yehova.

Ohaavo okathi mukina Davidi oonihenrye awe olipa murima vanceene. Okathi owo, aIsarayeli yaawana ekhotto ni atthu yaitthaniwa aFilisti. Nto aahikhala nakhotto mmosa nFilisti, aari oorakama vanceene! Nsina nawe aari Goliyathi. Owo aaninveeha Yehova vamosa ni anakhotto a aIsarayeli. Owo aaphavela wira aIsarayeli yawane nuuwo. Masi aIsarayeli yaanoova owana ni Goliyathi. Vaavo Davidi aiwale awe, aahimuleela Goliyathi wira: ‘Miyo kinoowana ni nyuwo, nto Yehova onookikhaliherya ni kinimooweryani!’ Nyuwo munoona wira Davidi aahilipa murima?— Aayo, owo aahilipa murima vanceene. Munnisuwela etthu yaakhumelenle moohipisa?

Davidi aahikuxa mukhoi awe ni maluku 5 oovilikeya, ni khurowa owana ni nFilisti ole. Vaavo Goliyathi anwenhe awe mmiravo ole, aahipacerya onveeha! Masi Davidi aahimuhimeerya wira: ‘Nyuwo munkirweela ni ekatana, masi miyo kinorweelani ni nsina na Yehova!’ Nto, Davidi aahikumiha nluku mmurupani mwawe, ohela vamukhoini; khumwaattamela Goliyathi,  ni omoopela. Nluku nle naahimmana Goliyathi vayuuci! Nto nFilisti ole aahimorela vathi ni khukhwa! MaFilisti makina yaahoova, ni khupacerya otthyawa. Munoonela sai, Davidi aawenrye sai omwiiva nFilisti ole?— Yehova taamukhalihenrye. Owo aari ootepa owerya onvikana nFilisti ole!

Muniixutta exeeni sa ntakiheryo na Davidi?— Yehova toowerya vanceene ni khuuvo onilikana awe. Nave, owo mpatthani anyu. Nto, okathi onirowa anyu woona etthu yowoopiha, muupuweleke wira Yehova onoowerya wookhaliheryani wira mukhale oolipa murima!