Ano an imo ginhihimo kon nahahadlok ka?— Bangin napabulig ka kan imo mama ngan papa. Pero may usa pa nga makakabulig liwat ha imo. Mas gamhanan gud hiya kay han bisan hin-o. Maaram ka ba kon hin-o hiya?— Oo, hi Jehova nga Dios. Aton pag-istoryahan an usa nga batan-on ha Biblia nga an ngaran David. Maaram hiya nga pirme hiya bubuligan ni Jehova, salit diri hiya nahahadlok.

Tikang gud han kabata ni David, gintutdoan hiya han iya mga kag-anak nga higugmaon hi Jehova. Nakabulig ito kan David nga diri mahadlok bisan kon may nahitatabo nga makaharadlok. Maaram hiya nga Sangkay niya hi Jehova ngan bubuligan gud hiya. Usa ka adlaw, han nagbabantay hi David hin mga karnero, may inabot nga daku nga leon ngan ginbanga an usa nga karnero. Maaram ka ba kon ano an ginhimo ni David? Ginlanat niya an leon, ginkaptan an barangas hito, ngan ginpatay! Ngan han may oso nga umatake ha mga karnero, ginpatay liwat ito ni David! Para ha imo, hin-o an binulig kan David?— Oo, hi Jehova.

May usa pa nga hitabo nga waray gud mahadlok hi David. An mga Israelita nakikig-away hadto kontra ha katawohan nga gintatawag nga mga Pilisteohanon. Usa han mga Pilisteohanon nga sundalo an uraura kahitaas, usa hiya nga higante! Hiya hi Goliat. Gintitinamay hini nga higante an mga sundalo nga Israelita pati hi Jehova. Gin-inayat ni Goliat an mga sundalo nga Israelita nga makig-away ha iya. Pero nahahadlok an ngatanan nga Israelita nga umato ha iya. Han nabatian ito ni David, nagsiring hiya kan Goliat: ‘Ako an maato ha imo! Bubuligan ako ni Jehova, ngan pipirdihon ko ikaw!’ Para ha imo, waray ba mahadlok hi David?— Waray gud hiya mahadlok. Karuyag mo ba mahibaroan kon ano an sunod nga nahitabo?

Nagdara hi David hin labyog ngan lima nga mahamis nga bato, ngan kinadto hiya ha higante basi makig-away. Han nakita ni Goliat hi David, gintinawaan niya hi David kay batan-on pa ito. Pero hi David nagsiring ha iya: ‘Makikig-away ka ha akon gamit an espada, pero makikig-away ako ha imo ha ngaran ni Jehova!’ Katapos nagbutang hiya hin bato ha iya labyog, dinalagan tipakadto kan Goliat, ngan iginlabyog ito pakadto ha higante. Naigo hi Goliat ha butnga han iya agtang! Natumba an higante ngan namatay! Nahadlok  gud an mga Pilisteohanon ngan nagdadlagan hira ngatanan. Kay ano nga napirde han usa nga batan-on nga pariho kan David an usa nga higante?— Ginbuligan hiya ni Jehova, ngan mas gamhanan gud hi Jehova kay han higante nga hi Goliat!

Ano an imo mahibabaroan ha istorya mahitungod kan David?— Mas gamhanan gud hi Jehova kay han bisan hin-o, ngan Sangkay mo hiya. Salit kon nahahadlok ka, hinumdumi nga bubuligan ka ni Jehova nga diri mahadlok!