AKO 6
Neʼe Mole Mataku Ia Tavite
Kotea ʼae ʼe ke fai moka ke mataku?— ʼE lagi ke alu ki tau faʼe peʼe ko tau tamai. Kaʼe ʼe ʼi ai tou tahi holaʼaga, pea ʼe malohi age ia ʼi te tagata. ʼE ke iloʼi pe ko ai ia ia?— Koia, ʼe ko Sehova ʼAtua. Ta vakaʼi he ʼu faʼahi ʼo ʼuhiga mo Tavite, te tama tupulaga ʼae ʼe talanoa ki ai ʼi te Tohi-Tapu. Neʼe mole mataku ia he neʼe ina iloʼi ʼe tokoni tuʼumaʼu pe Sehova kia ia.
Talu mai te kei veliveli ʼa Tavite, mo te akoʼi age e ʼana matuʼā ke ʼofa kia Sehova. Neʼe tokoni te faʼahi ʼaia kia Tavite ke mole mataku, maʼia ʼi ni aluʼaga fakamataku. Neʼe ina iloʼi ko Sehova neʼe ko tona kaumeʼa pea ʼe fia tokoni age kia ia. ʼI te tahi ʼaho, ʼi te leʼoleʼo e Tavite ʼana faga ovi, neʼe haʼu te laione ʼo toʼo te kiʼi ovi. ʼE ke iloʼi pe kotea ʼae neʼe fai e Tavite? Neʼe ina tuli te laione pea ina matehi ʼaki ʼona nima. Ki muli age, neʼe ʼohofi tana faga ovi e te uluso, pea neʼe toe matehi e Tavite ia te manu ʼaia. ʼI tau manatu la, ko ai ʼae neʼe tokoni kia Tavite?— ʼE ke moʼoni, neʼe ko Sehova.
Neʼe ʼi ai te tahi lakaga neʼe lototoʼa ai ia Tavite. Neʼe tauʼi e te kau Iselaele ia te kau Filisitini. Ko te tahi ʼo te kau solia ʼo te kau Filisitini, neʼe ko te foʼi tagata lahi. Neʼe higoa ko Koliate. Ko te foʼi tagata lahi ʼaia neʼe ina vaʼi te kau solia Iselaele pea mo Sehova. Neʼe fakatautau ia Koliate ki te kau solia Iselaele. Kaʼe neʼe matataku te kau Iselaele. ʼI te logo ʼa Tavite ki ai, neʼe ina ui kia Koliate: ‘ ʼE au tauʼi koe. ʼE tokoni mai anai ia Sehova pea ʼe au matehi anai koe.’ ʼI tau manatu la, neʼe lototoʼa koa ia Tavite?— ʼEi, neʼe lototoʼa ʼaupito. ʼE ke fia iloʼi pe kotea ʼae neʼe hoko ki muli age?
Neʼe toʼo e Tavite tana makamaka pea mo kiʼi foʼi maka ʼe nima pea neʼe alu ʼo tauʼi te foʼi tagata lahi ʼaia. ʼI te sio ʼa Koliate ki te kei tupulaga ʼa Tavite, neʼe ina kataʼi ia ia. Kaʼe neʼe ui age e Tavite kia ia: ‘ ʼE ke haʼu koe ki au mo he heleta kaʼe ʼe au alu atu au mo te huafa ʼo Sehova.’ Neʼe ina ʼai te kiʼi foʼi maka ki tana makamaka pea mo lele atu kia Koliate ʼo ina tukiʼi ʼaki. Neʼe ʼi te foʼi maka ʼi te foʼi laʼe ʼo Koliate. Neʼe toka ifo te foʼi tagata lahi ʼaia pea mate. ʼI
te matataku ʼa te kau Filisitini, neʼe natou feholaki fuli. Neʼe lava feafeaʼi ki te tama tupulaga ko Tavite hana malo ʼi te foʼi tagata lahi ʼaia?— Neʼe tokoni ia Sehova kia ia, pea neʼe malohi age ia Sehova ʼi te foʼi tagata lahi ʼaia.Neʼe mole mataku ia Tavite koteʼuhi neʼe ina iloʼi ʼe tokoni Sehova kia ia
Kotea te ako ʼe feala ke ke maʼu mai te hisitolia ʼo Tavite?— ʼE malohi age ia Sehova ʼi te tagata. Pea ʼe ko tou Kaumeʼa. Koia ʼi te temi ʼae ʼe ke mataku ai, ke ke manatuʼi ʼe lava tokoni atu ia Sehova ke ke lototoʼa.