Ken a chʼaʼ saajkileʼ, ¿baʼax ka beetik?... Maʼ xaaneʼ ka kaxtik u yáantaj a maama wa a taata. Baʼaleʼ yaan uláakʼ máax jeʼel u yáantkecheʼ. Letiʼeʼ maas yaan u muukʼ tiʼ jeʼel máaxakeʼ. ¿A wojel wa máaxiʼ?... Jaaj beyoʼ, Jéeoba Dios. Koʼox tʼaan tiʼ juntúul xiʼipal, u kʼaabaʼeʼ David. Le Bibliaoʼ ku yaʼalikeʼ Davideʼ u yojel yaan u yáantaʼal tumen Jéeoba, le oʼolal maʼ tu chʼaʼaj saajkiliʼ.

Desde tu chichnileʼ, Davideʼ kaʼansaʼab u yaabilt Jéeoba tumen u taataʼob. Lelaʼ le áant utiaʼal maʼ u chʼaʼik saajkil le ka tu aktáantaj nukuch talamiloʼoboʼ. Letiʼeʼ u yojel Jéeoba kun áantik tumen u amigo. Juntéenjeakileʼ, le táan u kanáantik u yalakʼ tamanoʼobeʼ, taal juntúul nuxiʼ leoneʼ ka tu bisaj juntúul tiʼ u chan tamanoʼob. ¿A wojel wa baʼax tu beetaj David? Bin u chukpacht le leonoʼ ka tu macheʼ ka tu kíimsaj. Uláakʼ juntéeneʼ tu kíimsaj xan juntúul oso taakchaj u jaantik u yalakʼ tamanoʼoboʼ. ¿Máax a tuklik áant David?... Jaaj beyoʼ, Jéeoba áante.

Yaan uláakʼ baʼax tu beetaj David tu yeʼesaj jach maʼ saajkiʼ. Le israelitaʼoboʼ táan kaʼach u baʼateloʼob tu contra le filisteoʼoboʼ. Juntúul tiʼ le soldadoʼob filisteoʼoboʼ jach nojoch yéetel kaʼanal u baakel; u kʼaabaʼeʼ Goliat. Le máakaʼ táan kaʼach u yaʼalik baʼal tiʼ le israelitaʼoboʼ bey xan tiʼ Jéeoba. Goliateʼ tu yaʼalaj ka yéeyaʼak juntúul israelita utiaʼal ka baʼatelnak tu yéetel. Baʼaleʼ le israelitaʼoboʼ saajkoʼob tiʼ. Le ka tu yuʼubaj David lelaʼ, tu yaʼalajtiʼ: «¡Teen kin baʼateʼel ta wéetel! ¡Jéeoba kun áantken utiaʼal in ganarkech!». A tuklikeʼ, ¿tu chʼaʼaj wa saajkil David?... Maʼ, maʼ tu chʼaʼaj saajkiliʼ. ¿A kʼáat wa a wojéelt baʼax úuch ka tsʼoʼoki?

Davideʼ tu chʼaʼaj u yúuntun yéetel cinco u pʼéelel tuunich wóolistakeʼ, ka bin baʼateʼel yéetel le nuxiʼ filisteooʼ. Le ka tu yilaj Goliat jach táankelem Davideʼ, káaj u cheʼejtik. Baʼaleʼ Davideʼ tu yaʼalajtiʼ: «Techeʼ ka taal tin wiknal yéetel junpʼéel espada, baʼaleʼ teneʼ kin taal ta wiknal tu kʼaabaʼ Jéeoba». David túuneʼ tu tsʼáaj junpʼéel tuunich tu yúuntuneʼ, áalkabnaj tu yiknal  Goliateʼ, ka tu chʼinaj. Le tuunichoʼ tsaʼay jach tu táan poolal Goliateʼ ka kíimi. ¡Bey úuchik u tsʼoʼokol tiʼ le nuxiʼ máakoʼ! Le uláakʼ filisteoʼob túunoʼ ka tu yiloʼob lelaʼ jach sajakchajoʼobeʼ ka púutsʼoʼob. Kex David jach táankelmeʼ, ¿bix úuchik u ganartik le nuxiʼ máakoʼ?... Jéeoba áante, tumen letiʼeʼ maas yaan u muukʼ tiʼ le nuxiʼ filisteooʼ.

¿Baʼax ka kanik tiʼ le baʼax tsʼoʼok k-ilkaʼ?... Jéeobaeʼ maas yaan u muukʼ tiʼ jeʼel máaxakeʼ. Le oʼolaleʼ ken a wuʼuy saajkecheʼ, kʼaʼajaktech lelaʼ: Jéeobaeʼ a amigo yéetel yaan u yáantkech utiaʼal u lukʼul a saajkil.