Wunεn waaru sɔɔ, gean kobu ya sɛ̃ ro?— Tɔn dabina bwisika ma ya sɛ̃. Su aruwaasi wi ba sokumɔ Yosiasin gari ko. Bibeli ya sun sɔ̃ɔsimɔ ma ya wi sɛ̃sia too u ka ko ye ya wã. Adama, u raa bɔrɔ geobu mɔ, be ba nùn somi. A de su gia su sosi Yosiasi ka win bɔrɔba sɔɔ.

Yosiasin tundowa Amɔɔ, u raa sãawa Yudan sunɔ. Amɔɔ u raa sãa tɔn kɔ̃so ma u bwãarokunu sãamɔ. Saa ye Yosiasin tundo u gu, Yosiasiwa u Yudan bandu di, sanam mɛ sɔɔ, wɔ̃ɔ nɔɔba ita tɔnawa u mɔ! A tamaa u sãa tɔn kɔ̃so nge win tundo?— Aawo, u ǹ sãa mɛ!

Baa mɛ Yosiasi u sãa aruwaasi bii yãkabu, u kĩ u Yehofa mɛm nɔɔwa. Yen sɔ̃, tɔn be ba Yehofa kĩ tɔnan suunu sɔɔwa u win bɔrɔba gɔsa. Ma bɔrɔ be, ba Yosiasi somi u ka ko ye ya wã. Berà ba sãa win bɔrɔ ben gabu?

Win bɔrɔ ben turon yĩsira Sofoni. Sofoni u raa sãawa Gusunɔn sɔmɔ wi u Yudan tɔmbu kirɔ kua, gãa kɔ̃su ni nu koo  be deema bà n bwãarokunu sãamɔ. Yosiasi u Sofoni swaa daki ma u gɔ̃ru doke ma u ǹ bwãarokunu sãamɔ, Yehofawa u koo sã.

Yosiasin bɔrɔ ben goowa maa Yeremi. Yosiasi ka Yeremi ba raa sãawa saaranu, ma ba kpɛ̃a wuu teu sɔɔ. Ben bɔrɔna dam kua sere sanam mɛ Yosiasi u gu, Yeremi u womu yorua. Womu ge sɔɔ, Yeremi u saara mɛsum win nuku sankiranu nu kpãaru n nɛ, domi win bɔrɔ kun maa wãa. Yosiasi ka Yeremi ba somina bu ka gea ko kpa bu ka Yehofa mɛm nɔɔwa.

Sɔ̃ɔsi terà kaa kpĩ a sua saa Yosiasin kom n di?— Baa mɛ Yosiasi ka sãa bii yãkabu, u gean kobu kĩ. U tuba ma n weenɛ u bɔrɔnu di ka be ba Yehofa kĩ. À n ka a bɔrɔba gɔsi, a de a be kasu be ba Yehofa kĩn wuuru sɔɔ! Ba koo maa kpĩ bu nun somi a ka gea ko!