Yala e hakili la a ka gɛlɛn ka ko tilennen kɛ wa?— Mɔgɔ caman b’a miiri ko o kɛli ka gɛlɛn. Bibulu b’a fɔ an ye ko a tun ka gɛlɛn ka ko tilennen kɛ kɛrɛnkɛrɛnnenyala kamalennin dɔ bolo min tɔgɔ tun ye Josiyasi ye. Nka teri ɲumanw tun bɛ a bolo minnu ye a dɛmɛ. An k’a ɲini ka Josiyasi ni a teriw dɔn ka ɲɛ.

Josiyasi fa tun ye Amɔn ye, Juda ka masakɛ. Amɔn tun ye kojugukɛlaba ye ani a tun bɛ boliw bato. Tuma min na Josiyasi fa sara, Josiyasi kɛra Juda masakɛ ye. Wa, a kɛra o ye k’a si to san segin dɔrɔn de la! Yala e hakili la Josiyasi tun ye kojugukɛla ye i n’a fo a fa ɲɔgɔn ye wa?— Ayi, a ma kɛ o ɲɔgɔn ye.

Hali k’a sɔrɔ a tun ka dɔgɔ, a tun ka di Josiyasi ye ka Jehova kan minɛ. Wa, a y’a sugandi ka teriya don a ni mɔgɔw cɛ minnu bɛ Jehova dɔrɔn de kanu. Ani olu ye Josiyasi dɛmɛ a ka ko tilennen kɛ. Josiyasi teri dɔw tun ye jɔni ye?

 A teri dɔ tun ye Sofoni ye. Sofoni tun ye kira dɔ ye min tun ye Juda mɔgɔw lasɔmi ko kojugu bɛ se ka u sɔrɔ ni u bɛ boliw bato. Josiyasi ye Sofoni ka kumaw lamɛn, a ye Jehova de bato, a ma boliw bato.

A teri dɔ wɛrɛ tun ye Jeremi ye. Ale ni Josiyasi si hakɛ tun ye kelen ye, ani u ye ɲɛnamaya kɛ ɲɔgɔn fɛ fo ka taa u kɔrɔbaya. Teriya sɛbɛ tun bɛ u cɛ, fo tuma min na Josiyasi sara, Jeremi ye dɔnkili kɛrɛnkɛrɛnnen dɔ sɛbɛn min b’a jira ko Josiyasi ɲɛnafinba bɛ a la. Jeremi ni Josiyasi ye ɲɔgɔn dɛmɛ ka ko tilennen kɛ ani ka Jehova kan minɛ.

I bɛ kalansira jumɛn sɔrɔ ka bɔ Josiyasi ka misaliya la?— Hali k’a sɔrɔ Josiyasi tun ka dɔgɔ, a tun ka di a ye ka ko tilennen kɛ. A tun b’a dɔn ko a teriw tun ka kan ka kɛ mɔgɔw ye, minnu bɛ Jehova kanu. A ɲini k’a dɔn ni i ka teri sugandi taw bɛ Jehova kanu ani k’a dɔn ni olu bɛ se ka i dɛmɛ ka ko tilennen kɛ!