ÑYE’ELANE 8
Josias a mbe a bili mbamba bemvôé
Ye wo buni na é ne tyi’ibi ya bo mam me ne mvo’é?— Abui bôte da buni na jamete é nji bo tyi’ibi. Kalate Zambe a liti bia na jamete é mbe mbia ayaé asu mongô be mbe be loone na Josias. Ve a nga bili mbamba bemvôé be nga volô nye mfa’a ôte. Bi tame zu kobô ajô Josias a bemvôé bé.
Ésa Josias a mbe a to jôé na Amon, njô bôte ya Juda. A mbe mbia môt, a kañe fe bengulemelan. Josias a nga bet éto njôan éyoñ ésa a wuya. A mbe a bili ve mimbu mwom! Ye wo buni na a mbe mbia môt ane ésa wé?— Momo!
Akusa bo a mbe a nga’ane mone mongô, Josias a mbe a kômbô bo Yéhôva mewôk. Nde a nga tobe na a bo amvôé ve a bôte be mbe be nye’e Yéhôva. Ane bemvôé bete be nga volô nye na a bo mame me ne mvo’é. Beza be mbe bemvôé be Josias?
Wua ya été a mbe a to jôé na Sophonie. Sophonie a mbe nkuli mejô
a nga bemene bôte ya Juda na, nge be kele ôsu a kañe bengulemelan, bé tôbane minjuk. Josias a nga bo Sophonie mewôk, nde a nga kañe Yéhôva sa ke bengulemelan.Mvôé fok Josias a mbe a bili é mbe jôé na Jérémie. Ba Josias be mbe bebé akala, a be nga yaé fe vôme wua. Amvôé dap é mbe avale ngul é ne na, éyoñe Josias a nga wu, Jérémie a nga tili mbamba mone jia na a yône Josias. Jérémie ba Josias be mbe be volan, môt ase a volô nyô mbo’o na a bo ve mame me ne mvo’é, a bo Yéhôva mewôk.
Jérémie ba Josias be mbe be volan asu na be bo mame me ne mvo’é
Éve’ela Josias ja ye’ele bia jé?— Akusa bo a mbe a nga’ane mone mongô, a mbe a kômbô bo mame me ne mvo’é. A mbe a yeme na a yiane bo amvôé ve a bôte ba nye’e Yéhôva. Wo fe jeñe na bemvôé bôé be bo bôte ba nye’e Yéhôva, a ba be ne volô wo na ô bo mame me ne mvo’é!
LAÑE BIFUSE BI
-
2 Minkañete 33:21-25; 34:1, 2; 35:25