Nabudlayan ka bala maghimo sang husto?— Madamo nga tawo ang nabudlayan. Ginasugiran kita sang Biblia nga may bata sadto nga si Josias, kag ginbudlayan gid sia maghimo sang husto. Pero may maayo sia nga mga amigo nga nagbulig sa iya. Istoryahan naton subong ang parte kay Josias kag sa iya mga amigo.

Ang tatay ni Josias amo si Amon, nga hari sang Juda. Si Amon malain gid kag nagasimba sa mga idolo. Sang napatay ang tatay ni Josias, sia ang nangin hari sang Juda. Pero walo pa lang sia ka tuig sadto! Sa banta mo, malain man bala sia pareho sa iya tatay?— Indi.

Bisan bata pa si Josias, gusto niya tumanon si Jehova. Gani, ang iya gin-amigo amo lamang ang mga tawo nga nagapalangga kay Jehova. Kag ginbuligan nila si Josias nga himuon ang husto. Sin-o ang mga amigo ni Josias?

Ang isa niya ka amigo amo si Sofonias nga propeta. Ginpaandaman ni Sofonias ang mga tawo sa Juda nga may malain  nga matabo sa ila kon magsimba sila sa mga idolo. Nagpamati si Josias kay Sofonias kag wala gid sia nagsimba sa mga idolo, kundi kay Jehova lamang.

Ang isa pa ka amigo ni Josias amo si Jeremias. Halos magka-edad sila kag magkaupod nga nagdaku sa isa ka lugar. Miguhay gid sila, gani sang napatay si Josias, naghimo si Jeremias sing isa ka espesyal nga kanta parte sa iya kasubo sa pagkapatay sang iya amigo. Nagbuligay sanday Jeremias kag Josias sa paghimo sang husto kag pagtuman kay Jehova.

Ano ang matun-an mo sa halimbawa ni Josias?— Bisan bata pa si Josias, gusto gid niya himuon ang husto. Kabalo sia nga dapat mangamigo sia sa mga nagapalangga kay Jehova. Gani, maayo gid nga pilion mo man ang mga amigo nga nagapalangga kay Jehova, kag makabulig sa imo nga himuon ang husto.