Ove mo munu kutja ouzeu okutjita oviṋa oviwa po?— Ovandu ovengi ve muna nao. Ombeibela i tu raera kutja ya ri ouzeu tjinene kokazandona kena Josija okutjita oviṋa oviwa. Posi yokutja oko kari nomapanga omawa ngaaye ke vatere. Indjo tu rihonge ovingi ohunga na Josija nomapanga wako.

Ihe yaJosija wa ri Amon, ombara yaJuda. Amon wa ri omundu omuvi tjinene nu ee rikotamene kovisenginina. Indu ihe yaJosija tja ṱa, Josija ongwa rira ombara yaJuda. Posi yokutja eye wa ri nozombura hambondatu uriri! Mo munu kutja eye wa ri omundu omuvi tjimuna ihe po?— Kako, eye kari omundu omuvi!

Nandarire ngunda a ri omuṱiṱi tjinene, Josija aa vanga okukara nonḓuviro ku Jehova. Okutja eye wa toorora okurira epanga rovandu mba suvera Jehova porwawo. Nu owo va vatera Josija kutja ma tjite oviṋa oviwa. Oouṋe mba ri omapanga waJosija?

Epanga re rimwe ra ri Sefanja. Sefanja wa ri omuprofete ngwaa rakiza ovature vaJuda kutja maku tjitwa oviṋa ovivi ku wo indu tji  ve rikotamene kovisenginina. Josija wa puratena ku Sefanja nu e rikotamene ku Jehova erike nungwari kakovisenginina.

Epanga raJosija rarwe ra ri Jeremia. Eye wa ri notjiwondo tjimwe na Josija nu va ri ovararanganda indu tjaave kuru. Owo va ri omapanga omanene ngandu Jeremia tja tjanga eimburiro rapeke indu Josija tja ṱa okuraisa kutja aa hihamenwa i ye tjinene. Jeremia na Josija aave vaterasana kutja ve tjite oviṋa oviwa nokutja ve kare nonḓuviro ku Jehova.

Ove mo rihongere tjike kotjihorera tjaJosija?— Nandarire ngunda Josija ari okanatje okaṱiṱi, eye aa vanga okutjita oviṋa oviwa. Eye aa tjiwa kutja ma sokupangasana novandu mba suvera Jehova. Ove kondja kutja u toorore omapanga nga suvera Jehova nu ngu maye ku vatere okutjita oviṋa oviwa!