TIMEΓRI 8
Yucya yextaṛ imdukkal n lεali
Iţban-ak-d belli yewεeṛ aţ-ţxedmeḍ ayen yelhan?— Aṭas n medden iwumi i d-iţban yewεeṛ. Adlis Iqedsen ihdeṛ-ed ɣef yiwen weqcic amecṭuḥ, isem-is Yucya. Yella iwεeṛ-as mliḥ ad ixdem ayen yelhan. Lameεna, yesεa imdukkal n lεali i t-iεawnen. Eyya-d a nissin anwa i d Yucya w’a nissin anwi-ten yemdukkal-agi-ines.
Yucya d mmi-s n Amun, sselṭan n tmurt n Yahuda. Amun diri-t mliḥ; yella iεebbed lmeṣnuεat. Asmi yemmut Amun, Yucya yuɣal d sselṭan n Yahuda deg wemkan-is. Lameεna, yesεa tmen snin kan di leεmeṛ-is! Ar ɣur-ek, yella diri-t am baba-s?— Ala, ur yelli ara yakk am baba-s!
Ṣafanya yenna-yasen i lɣaci belli ur ilaq ara ad εebden lmeṣnuεat.
Yucya iḥemmel ad yaɣ awal i Yahwa seg wasmi yella d amecṭuḥ. Ihi, ḥaca wid i geţḥibbin Yahwa i gextaṛ ad ilin d imdukkal-is. Imdukkal-agi-ines εawnen-t ad yexdem ayen yelhan. A d-nehdeṛ ɣef sin seg-sen.
Yiwen d nnbi, isem-is Ṣafanya. Ṣafanya yenna i wid izedɣen di Yahuda belli ma yella εebbden lmeṣnuεat a sen-d-teḍru twaɣit. Yucya iḥess-as: d Yahwa i geεbed, mačči d lmeṣnuεat.
Wis sin d Irmiya. Ad ilin qrib ţ- ţizzyiwin neţţa d Yucya, yerna imukan anda i d-kkren mseqraben. Llan d iḥbiben n ṣṣeḥ. Γef wayagi, asmi yemmut Yucya, Irmiya yekteb fell-as yiwen n ccna swayes i d-ibeyyen belli yejjem-it (icedha-t) mliḥ. Irmiya akk-d Yucya mεawanen akken ad xedmen ayen yelhan w’ad aɣen awal i Yahwa.
Yucya akk-d Irmiya mεawanen bac ad xedmen ayen yelhan.
Acu i d-tḥefḍeḍ seg wayen yexdem Yucya?— Yucya iḥemmel ad yexdem ayen yelhan, seg wasmi yella d amecṭuḥ. Yeẓra belli siwa wid iḥemmlen Yahwa i glaq ad ilin d imdukkal-is. Kečč daɣen ur teţţu ara: d wid i geţḥibbin Yahwa akk-d wid i gzemren a k-εiwnen akken aţ-ţxedmeḍ ayen yelhan ara textiṛeḍ d imdukkal-ik!
