ບົດຮຽນ 8
ໂຢເຊຍເຊມີໝູ່ທີ່ດີ
ລູກຄິດວ່າການເຮັດສິ່ງທີ່ຖືກຕ້ອງເປັນເລື່ອງທີ່ຍາກບໍ?— ຫຼາຍຄົນກໍຄິດແບບນັ້ນ. ຄຳພີໄບເບິນບອກເຮົາວ່າມີສິ່ງທີ່ຍາກເປັນພິເສດສຳລັບເດັກນ້ອຍຜູ້ຊາຍຄົນໜຶ່ງເຊິ່ງພະຍາຍາມເຮັດສິ່ງທີ່ຖືກຕ້ອງ ລາວຊື່ໂຢເຊຍເຊ. ແຕ່ລາວມີໝູ່ທີ່ດີທີ່ຈະຊ່ວຍລາວ. ໃຫ້ເຮົາມາຮຽນເລື່ອງຂອງໂຢເຊຍເຊແລະໝູ່ຂອງລາວນຳກັນຕື່ມອີກເນາະ.
ພໍ່ຂອງໂຢເຊຍເຊເປັນກະສັດຂອງພວກຢູດາແລະເປັນຄົນທີ່ຊົ່ວຫຼາຍ ລາວຊື່ອາໂມນ. ລາວນະມັດສະການຮູບປັ້ນ. ເມື່ອພໍ່ຂອງໂຢເຊຍເຊຕາຍ ໂຢເຊຍເຊຈຶ່ງໄດ້ເປັນກະສັດຂອງຢູດາ ຕອນນັ້ນລາວອາຍຸພຽງແຕ່ແປດປີເທົ່ານັ້ນ! ລູກຄິດວ່າລາວຈະເຮັດຊົ່ວຄືກັບພໍ່ຂອງລາວບໍ?— ບໍ່ ລາວບໍ່ເຮັດແບບນັ້ນ!
ເຖິງແມ່ນວ່າລາວຍັງນ້ອຍກໍຕາມ ໂຢເຊຍເຊກໍເຊື່ອຟັງພະເຢໂຫວາ. ລາວເປັນໝູ່ທີ່ສະໜິດກັບຜູ້ທີ່ຮັກພະເຢໂຫວາເທົ່ານັ້ນ ແລະໝູ່ນັ້ນໄດ້ຊ່ວຍລາວໃຫ້ເຮັດສິ່ງທີ່ຖືກຕ້ອງ. ມີໃຜແດ່ທີ່ເປັນໝູ່ຂອງລາວ?
ໝູ່ຂອງລາວຄົນໜຶ່ງຊື່ໂຊໂຟນີ. ໂຊໂຟນີເປັນຜູ້ພະຍາກອນທີ່ເຕືອນຊາວຢູດາທີ່ເຮັດຊົ່ວໃຫ້ຮູ້ວ່າຈະມີສິ່ງທີ່ບໍ່ດີເກີດຂຶ້ນກັບພວກເຂົາ ຖ້າຫາກວ່າເຂົາຍັງນະມັດສະການ
ຮູບປັ້ນຕໍ່ໄປ. ໂຢເຊຍເຊເຊື່ອຟັງໂຊໂຟນີແລະໄດ້ນະມັດສະການພະເຢໂຫວາ ລາວບໍ່ນະມັດສະການຮູບປັ້ນ.ໝູ່ຂອງໂຢເຊຍເຊອີກຄົນໜຶ່ງຊື່ເຢເຣມີ. ລາວມີອາຍຸສໍ່າກັນກັບໂຢເຊຍເຊ ແລະເຮືອນກໍຢູ່ໃກ້ໆກັນຕອນທີ່ເຂົາເຈົ້າພວມເຕີບໃຫຍ່ຂຶ້ນ. ພວກເຂົາເປັນໝູ່ທີ່ດີຕໍ່ກັນອີຫຼີ ເມື່ອໂຢເຊຍເຊຕາຍ ເຢເຣມີໄດ້ແຕ່ງເພງພິເສດເພື່ອສະແດງວ່າລາວຮັກແລະຄິດຮອດໂຢເຊຍເຊຫຼາຍແທ້ໆ. ເຢເຣມີແລະໂຢເຊຍເຊຊ່ວຍກັນແລະກັນໃນການເຮັດສິ່ງທີ່ຖືກຕ້ອງແລະເຊື່ອຟັງພະເຢໂຫວາ.
ໂຢເຊຍເຊແລະເຢເຣມີຊ່ວຍກັນແລະກັນໃນການເຮັດສິ່ງທີ່ຖືກຕ້ອງ
ລູກໄດ້ບົດຮຽນຫຍັງຈາກຕົວຢ່າງຂອງໂຢເຊຍເຊ?— ເຖິງວ່າໂຢເຊຍເຊຈະຍັງເປັນເດັກນ້ອຍ ແຕ່ລາວກໍຢາກເຮັດສິ່ງທີ່ຖືກຕ້ອງ. ລາວຮູ້ວ່າລາວຄວນເປັນໝູ່ກັບຜູ້ທີ່ຮັກພະເຢໂຫວາ. ລູກຕ້ອງເລືອກເປັນໝູ່ກັບຄົນທີ່ຮັກພະເຢໂຫວາເທົ່ານັ້ນເດີ ແລະໝູ່ຂອງລູກຕ້ອງເປັນຜູ້ທີ່ຈະຊ່ວຍລູກໃຫ້ເຮັດສິ່ງທີ່ຖືກຕ້ອງສະເໝີ.