Inti taħseb li hu diffiċli tagħmel dak li hu tajjeb?— Ħafna nies jaħsbu li hu diffiċli. Il-Bibbja tgħidilna dwar tifel jismu Ġosija li kien diffiċli ħafna għalih li jagħmel dak li hu tajjeb. Imma kellu ħbieb tajbin li għenuh. Ejja nitgħallmu iktar dwar Ġosija u l-ħbieb tiegħu.

Missier Ġosija kien Amon, is-sultan taʼ Ġuda. Amon kien ħażin ħafna u kien iqim lill-idoli. Meta miet missier Ġosija, Ġosija sar is-sultan taʼ Ġuda. Imma kellu biss tmien snin! Taħseb li hu kien ħażin bħal missieru?— Le, ma kienx!

Anki meta kien żgħir ħafna, Ġosija ried jobdi lil Ġeħova. Allura bħala ħbieb għażel biss lil dawk li kienu jħobbu lil Ġeħova. U dawn għenu lil Ġosija jagħmel dak li hu tajjeb. Min kienu wħud mill-ħbieb taʼ Ġosija?

Wieħed mill-ħbieb tiegħu kien Sofonija. Sofonija kien profeta li wissa lin-nies taʼ Ġuda li jekk iqimu lill-idoli kien se  jiġrilhom affarijiet ħżiena. Ġosija semaʼ minn Sofonija u qiem lil Ġeħova, mhux lill-idoli.

Ħabib ieħor taʼ Ġosija kien Ġeremija. Bejn wieħed u ieħor hu kien daqs Ġosija, u meta kienu tfal kienu jgħixu viċin taʼ xulxin. Tant kienu ħbieb tal-qalb li meta Ġosija miet, Ġeremija kiteb għanja speċjali dwar kemm kien jimmissja lil Ġosija. Ġeremija u Ġosija għenu lil xulxin biex jagħmlu dak li hu tajjeb u biex jobdu lil Ġeħova.

X’tistaʼ titgħallem mill-eżempju taʼ Ġosija?— Anki meta Ġosija kien għadu tifel żgħir, ried jagħmel dak li hu tajjeb. Kien jaf li l-ħbieb tiegħu kellhom ikunu nies li jħobbu lil Ġeħova. Kun ċert li tagħżel ħbieb li jħobbu lil Ġeħova u li jistgħu jgħinuk tagħmel dak li hu tajjeb!