Iwewe unovona kuti zvinonesa kuita zvakarungama here?— Vandhu vazinji vanovona kudaro. Bhaibheri rinotibvunja kuti kuita zvakarungama zvakava zvinonesa maningi ku mujaha umweni waidanijwa Josia. Asi iyena wakava no shamwari jaushoni jakamubesa. Ngatende tijijire zvizinji ngo pamusoro pa Josia pomwe no shamwari jake.

Baba va Josia vainga Amoni, mambo wo Judha. Amoni wainga mambo waishatisisa zve wainamata zvithombe. Baba va Josia pavakafa, Josia wakagajwa mambo wo Judha. Asi iyena wainga no makore masere basi o kubahwa! Unorangarira kuti iyena wainga mushati inga ndi baba wake?— Haiwa, aacaingepi!

Pikija paainga ari mudoko kamare, Josia waida kuzwira Jehovha. Ngo kudaro iyena wakasana kuva no ushamwari basi no vandhu vaida Jehovha. Ivona vakabesera Josia kuita zvainga zvakarungama. Ngo vapi vamweni vakona vainga shamwari ja Josia?

 Umwe wo vainga shamwari jake wainga Zefania. Zefania wainga muporofita wakangwaja vandhu vo Judha ngo pamusoro po zviro zvakashata zvaizovaitikira kudari ivona vakanamata zvithombe. Josia wakapurutana Zefania zve wainamata Jehovha, haiwa zvithombe.

Shamwari imwenizve ya Josia wainga Jeremia. Iyena wainga no mupira umweo no wa Josia zve ivona vakareba vese inga zvigarisano. Ivona vainga shamwari kamare zvokuti Josia naafa, Jeremia wakatara ndumbo yakadakaja maningi yainangira mazwiro ake ngo kurasikihwa ndi Josia. Jeremia na Josia vaibesana umwe no umweni kuita zvakarungama no kuzwira Jehovha.

Ungajijenyi kubvira ku muezaniso wa Josia?— Pikija Josia wainga mwana mudoko, iyena waida kuita zvakarungama. Iyena waizviziva kuti waidikana kuita ushamwari no vandhu vanoda Jehovha. Iva no cokwadi co kuti unokheta inga shamwari vayani vanoda Jehovha zve vaya vangakubesa kuita zvakarungama!