Se a tau faka‵tau, e faigata ke fai te mea tonu?— E mafau‵fau a te tokoukega o tino me e faigata. E fai mai te Tusi Tapu me ne faigata ‵ki eiloa ki se tamaliki tagata e igoa ki a Iosia telā ne fai ne ia te mea ‵lei. Kae ne maua ne ia a taugasoa ‵lei kolā ne fesoasoani atu ki a ia. Ke na tauloto tatou ki mea e uke atu e uiga ki a Iosia mo ana taugasoa.

A te tamana o Iosia ko Amoni, se tupu o Iuta. Ne masei ‵ki eiloa a Amoni kae ne tapuaki atu ki tupua. I te taimi ne mate ei te tamana o Iosia, ne fai a Iosia mo fai te tupu o Iuta. Kae ko valu fua ana tausaga! Se a tau faka‵tau me ne masei a ia e pelā mo tena tamana?— Ikai, e seki fai a ia penā!

Ke oko foki eiloa ki te taimi koi foliki ei a ia, ne manako a Iosia ke fakalogo ki a Ieova. Tela la, ne filifili tou tagata ke fai taugasoa fua mo tino kolā e a‵lofa ki a Ieova. Kae ne fesoasoani atu ki a Iosia ke fai te mea ‵lei. Ko oi a nisi taugasoa o Iosia?

E tokotasi mai i ei ko Sefanaia. A Sefanaia se pelofeta telā ne fakailoa atu ne ia  ki tino o Iuta me ka ‵tupu a mea ma‵sei ki a latou māfai e tapuaki latou ki tupua. Ne fakalogo a Iosia ki a Sefanaia kae ne tapuaki atu ki a Ieova, e se ki tupua.

A te suā taugasoa o Iosia ko Ielemia. Kāti e tai kautama a ia mo Iosia, kae ne ‵nofo ‵pili fua lāua i te taimi koi fo‵liki ei. Ne ‵pili ‵ki te la taugasoa telā ne tusi ei ne Ielemia se pese fakapito e uiga ki tena sē sologa i te taimi ne mate ei a Iosia. Ne fakatau fesoasoani lāua ke fai te mea ‵lei kae faka‵logo ki a Ieova.

Se a te mea e mafai o tauloto ne tatou mai i te fakaakoakoga a Iosia?— Ke oko foki eiloa ki te taimi koi foliki ei a Iosia, ne manako tou tagata ke fai te mea ‵lei. Ne iloa ne ia me e ‵tau o fai taugasoa a ia ki tino kolā e a‵lofa ki a Ieova. Ke fakamautinoa aka me e filifili eiloa ne koe a taugasoa kolā e a‵lofa ki a Ieova kae e mafai o fesoasoani atu ke fai ne koe te mea ‵lei!