Falaka ba Yehuwa hei pi wobesar, mani ama doaiy. Ama miposesei ya pi kilikil. Heiopi de paneng pi funa ya Yehuwa hei pi wala wobesar na. Na riy bay ri heiwuda diy?— Surah Rieling homi mia de abeti nuku he falaka hei wobesar hana he Yeremia. De Yehuwa mihiyena haba Yehuwa hei langkaber de wodarang ba doaiy wobesar na. Mie, he falaka mihalal.

Hedimia Yeremia dara abeti, Yehuwa de Yeremia habot ama ba beka mipaneng wei wohokafang ba de wodarang. Yeremia de wotanut heiopi mu beka. Ya, Yeremia homi wala matorang ba mipaneng na. De Yehuwa wohokafang, ’Nala he ne wohokafang nahani ne wala hiyeng na. Ne dara la tukai abeti’.  Haba Yehuwa de wohawai, ’Funa na. Ne omong.’

Hare, hedimia Yeremia de ama wohokafang, de wala mi damohawai na Allah de hamong nahani. E wotanut, ama hei wei de Yeremia hamau buka haluol rena?— Walna. Ama la hosesei ya he kilikil. Mani, ama domaha hei faheng! E wotanut, Yeremia homi hedi mia lateiwuda?— Dekul funa. Dewofang, ’Yehuwa hei noaiy wobesar na.’ Haba, homi kul-kul doiy?— Walna, de wala doaiy na. Homi kul Yehuwa mihiyena, hare Yehuwa he maring de wala wodarang ba wobesar na. Ya, Yeremia de wala wodarang ba doaiy wobesar na, Yehuwa bay de hei wofikang.

Hedosama, ama tahupang wei de Yeremia hei miy iya nabuk ba bakong miwati. Iya, ya siyeng ma bay ama wala her na. Ama heiwei domaha Yeremia nabuk mia ba domong. Haba, Yehuwa de homong ba dobirang diy!

Yeremia he falaka hei ri lateiur wosakolah?— Mani de funa, haba Yehuwa hei dekul wobesar. Riy bay ri Yeremia heiwuda kang. Yehuwa hei ri wobesar mani ama la rosesei ya ri kilikil. Hedimu mani ri funa ya ri farot. Haba, worirang na. Falaka ba Yehuwa heimu kul wobesar te. Yehuwa dekul romong, hedosama de Yeremia homong wuda.