Diosat parlir sartan ukhajja, awisajj jaqenakajj colerasipjjewa, jan ukajj larusipjjewa. Ukhaman uñjasisajj janiw Diosat jukʼamp parlañ munjjsnati. ¿Jumajj ukhaman uñjasirïtati?... Bibliajj mä waynatwa parlistu, jupajj Jehová Diosar wal munasïna. Ukampis mä kutejj janiw Diosat parlañ munjjänti. Uka waynajj Jeremías satänwa, jupatwa jichhajj yatjjatañäni.

Diosajj Jeremiasar akham sänwa: “Jan wali luräwinakap apanukupjjañapataki jaqenakar yatiyam” sasa. Jeremiasasti akham sarakïnwa: “¡Nayajj wawäsktwa, janiw parlañsa yatkti!” sasa. Ukampis Diosajj “jan ajjsaramti, nayaw yanapaskäma” sasaw Jeremiasar chʼamachtʼäna.

 Ukatwa Jeremiasajj akham yatiyañ qalltäna: “Jan wali luräwinakam jan apanukupkäta ukhajja, Diosajj juchañchapjjätamwa” sasa. ¿Jaqenakajj Jeremiasar istʼapjjpachänti?... Janiw istʼapkänti. Yaqhepajj larusipjjänwa, yaqhepasti wal colerasipjjäna, jiwayañ kun munapjjäna. ¿Kunjamakis Jeremiasajj jikjjataspachäna?... Wal ajjsarayasïna ukat “janipuniw Diosat jukʼamp parljjäti” sasaw säna. ¿Cheqapunit Diosat jan parljjpachäna?... Jeremiasajj Jehová Diosar wal munasïna, ukhamajj janiw Jupat parlañ jaytirjamäkänti, jaqenakar Diosat parlaskakïnwa. Ukatwa Diosajj enemigonakapat jarkʼaqäna.

Mä kutejj jan wali jaqenakaw Jeremiasar mä manqha phujur jaqontapjjäna. Ukanjja ñeqʼekiw utjäna, ukat janiw ni umsa ni manqʼsa Jeremiasar ukan churapkänti. Jiwañapatakiw uka jan wali jaqenakajj ukham lurapjjäna. Ukampis Diosaw Jeremiasar yanaptʼäna.

¿Kunsa Jeremiasan sarnaqäwipat yateqsna?... Awisajj ajjsarkchïnsa, Jeremiasajj Jehová Diosat parlapunïnwa. Jichhürunakan Diosat parlir sartan ukhajja, yaqhep jaqenakajj larusipjjewa, yaqhepasti wal colerasipjje. Ukhampachasa, Diosat parlaskakiñamawa. Jan armasimti, Jehová Diosajj yanaptʼapunïtamwa, kunjamtï Jeremiasar yanaptʼkäna ukhama.