Bisa dogén ada anak ané ngedékin lan gedeg tekén iraga krana iraga ngorahin ia unduk Yehuwa. Situasiné ené bisa ngranaang iraga suud ngomongang unduk Tuhan. Apaké cening taén marasa buka kéto?​— Cakepan Suci nyeritaang unduk anak truna ané sayang tekén Yehuwa kéwala ia suba das suud ngomongang unduk Tuhan. Anaké ené madan Yeremia. Mai plajahin kéngkén ceritané.

Dugas Yeremia enu bajang, Yehuwa ngorahin ia ngemaang peringatan tekén anaké apang suud nyalanang ané jelek. Unduké ené kéweh gati buat Yeremia, lan ia marasa takut. Ia ngorahang tekén Yehuwa kéné: ’Tiang sing duweg ngomong. Tiang anak truna.’ Lantas, Yehuwa masaut kéné: ’Eda jejeh. Ulun lakar nulungin cening.’

 Lantas Yeremia mulai ngemaang peringatan tekén anaké ditu, yéning tusing nyak marobah anaké ento lakar kena hukuman. Menurut cening apaké anaké ento nyak ningehang peringatan uli Yeremia?​— Tusing. Ipun ngéjék lan gedeg sajaan tekén Yeremia. Ada ané dot ngamatiang Yeremia! Menurut cening kéngkén perasaanné Yeremia?​— Ia takut lan ngomong kéné: ’Tiang tusing buin lakar ngomongang unduk Yehuwa.’ Apaké saja ia nyerah?​— Sing, ia tusing nyerah. Ia seken-seken sayang tekén Yehuwa ento alasanné ia tusing ngidaang suud ngomong unduk Yehuwa. Ulian Yeremia tusing nyerah, Yehuwa terus nyelametang ia.

Contoné, ada anak muani jaat ané taén ngentungang Yeremia ka tengah sumuré ané bek misi endut. Ditu sing ada yéh lan dedaaran. Keneh anaké ento apang Yeremia mati ditu. Kéwala, ulian wantuan Yehuwa, ia kaslametang!

Apa ané bisa cening plajahin uli contoné Yeremia?​— Yadiapin ia taén marasa takut, ia tusing suud ngomongang unduk Yehuwa. Dugas ngomongang unduk Yehuwa, anaké bisa dogén ngéjék lan gedeg tekén cening. Cening masih bisa marasa sing juari utawi jejeh. Eda kanti suud ngomongang unduk Yehuwa. Ida lakar nulungin cening, cara Yehuwa nulungin Yeremia.