Tingki marbarita na uli, olo do adong na mangarehei jala muruk tu hita. On mambahen hita gabe mabiar marbarita. Hea do dihilala hamu songon i?​— Di Bibel, adong sahalak dolidoli na margoar si Jeremia. Ibana mangkaholongi Jahowa. Alai, hea do ibana mandele jala ndang olo be pasahathon barita sian Jahowa. Taparsiajari ma taringot si Jeremia.

Tingki poso dope si Jeremia, disuru Jahowa ma ibana pasingothon angka jolma asa unang mangulahon hajahaton. Mabiar do si Jeremia mangulahon i. Didokkon ma tu Jahowa: Ndang huboto aha na laho dohononku. Poso dope ahu. Alai, dialusi Jahowa ma: Unang mabiar ho. Urupanku do ho.

 Alani i, gabe olo ma si Jeremia pasahathon sipasingot i tu angka jolma. Didok ibana, molo ndang muba diuhum Jahowa ma nasida. Molo pandapotmu, ditangihon nasida do hata na pinasahat ni si Jeremia i?​— Ndang dioloi. Direhei jala dimuruki nasida do ibana. Jala naeng dibunu do si Jeremia! Molo pandapotmu, songon dia do pangkilalaan ni si Jeremia?​— Mabiar ma ibana. Didok ibana ma: Ndang olo be ahu pasahathon sipasingot na sian Jahowa i. Alai, tutu do ibana ndang olo pasahathon i?​— Ndang. Ala holong rohana tu Jahowa, marsitutu do si Jeremia pasahathon barita sian Jahowa. Alani i, diurupi jala dilinggomi Jahowa ma ibana.

Umpamana, didabuhon angka parjahat do si Jeremia tu sumur. Ndang adong sipanganon dohot siinumonna. Ditadingkon nasida si Jeremia disi. Alai, diurupi Jahowa do ibana. Boi ma ibana malua!

Aha do na taparsiajari sian si Jeremia?​— Nang pe sipata mabiar, sai marsitutu do ibana pasahathon hata ni Jahowa. Songon i ma hita tingki marbarita na uli, olo do adong halak mangarehei jala muruk. Ra, gabe maila jala mabiar ma hita. Alai, marsitutu ma hita marbarita. Urupan ni Jahowa do hita songon Ibana mangurupi si Jeremia.