É ne kui biyoñe biziñe na bôte be kpwe’ele bia, nge wô’ô bia ôlun amu bia kate be mame ma lat a Yéhôva. Jamete é ne tindi bia na bi bo teke kômbô beta kobô ajô Zambe. Ye wo fe ô wô’ôtaneya nalé?— Kalate Zambe a kañete bia ajô ya ndôman éziñ é nga kômbô jô’é nkañetane mejô me Yéhôva, akusa bo a mbe a nye’e nye. A mbe éyôlé na Jérémie. Bi tame zu fas ajô dé.

Éyoñe Jérémie a mbe ndôman, Yéhôva a nga jô nye na a kate bôte na, be bo teke beta bo mbia be mam. Jamete é mbe angôndô ya ayaé asu Jérémie, a mbe fe a ko woñ. Nde a nga kobô Yéhôva a jô’ô nye na: ‘Me ne te yeme kobô; amu me ne mongô.’ Ve Yéhôva a nga jô nye na: ‘Te ko woñ, mé volô wo.’

 Ane Jérémie a nga taté na a bemene bôte na nge ba tyendé ki, Yéhôva é foñôsô be. Ye wo buni na bôte be nga vô’ôlô Jérémie?— Teké’é. Bôte béziñ be mbe be kpwe’ele nye, ba bevo’o ki be wô’ô nye mbia ôlun. Bôte befe be nga kômbô wôé nye! Wo buni na Jérémie a nga wô’ôtan aya?— A nga ko mbia woñ a jô na: ‘Ma ye ke beta kobô ajô Yéhôva éyoñ éfe.’ Ve, ye a nga bo teke beta kobô?— Momo. A mbe a nye’e Yéhôva aval é ne na, a nji be ngule ya tabe évôl. Nde fe, mbôle a nga ke ôsu a kobô, Yéhôva a nga ba’ale nye.

Bi ne fe simesan éyoñe mbia be bôte be nga wua Jérémie édo’o ébé é mbe njalan a mbotok. A nji be a bili jôme ya di, nge mendime ya nyu. Bôte bete be mbe be yi na Jérémie a wu. Ve Yéhôva a nga volô nye na a bo te wu!

Éve’ela Jérémie é ne ye’ele wo jé?— Akusa bo na biyoñe biziñ a mbe a ko woñ, a nga ke ôsu a kañete mejô me Yéhôva. Éyoñe wo kañete mejô me Yéhôva, bôte be ne kpwe’ele wo nge wô’ô wo ôlun. Jamete é ne bo na ô wô’ô ôson, nge na ô ko woñ. Ve kele ôsu a kañete mame ma lat a Yéhôva. A ye volô wo kom ése, ane a nga volô Jérémie.