Ha mashimbu akwo atu kakutukekuna hanji kutwivwila uli muze tunahanjika no hakutwala kuli Yehova. Chino muchihasa kutukwika kuhanjika hakutwala kuli Zambi. Hichinapu kama kuli yena?— Mbimbiliya yinatulweze hakutwala kuli umwe mukweze yoze te wakuzanga Yehova alioze ha mashimbu amwe iye yamba kwecha kuhanjika hakutwala kuli iye. Jina lienyi te Jeremia. Tulilongesenu hakutwala kuli iye.

Muze Jeremia te uchili mukweze, Yehova yamwamba ngwo toweza atu hanga eche kulinga yuma yipi. Chino te chikalu chinji kuli Jeremia, nawa iye kevwile woma. Iye yamba kuli Yehova ngwenyi: ‘Yami chiso kunyingika yize mungwamba. Nguchili wika mukweze.’ Alioze Yehova yamwamba ngwenyi: ‘Kanda wivwa woma. Yami mungukukwasa.’

 Ha chino Jeremia yaputuka kutoweza atu ngwo nyi kalumwine yitanga yo yipi kumamwesa lamba. Shina ayo kalingile yize Jeremia ambile?— Ka. Ayo yakekuna Jeremia nawa yamuvwila uli. Amwe yazanga kumushaha! Kuchi Jeremia evwile?— Iye yevwa woma nawa yamba ngwenyi: ‘Yami chichi kuhanjika nawa hakutwala kuli Yehova ni limwe tangwa.’ Shina iye kechele kuhanjika?— Ka, iye kakechele kuhanjika. Iye te kakuzanga chinji Yehova kashika te kechi kuhasa kwecha kuhanjika hakutwala kuli iye. Amu Jeremia kakechele kuhanjika, kashika Yehova anakamulamwina.

Chilweza ngwe chino, limwe tangwa, amwe malunga api yanyasa Jeremia mu wina wa malowa. Iye kakamwehele kulia chipwe meya akunwa. Malunga jacho yazanga kuhichika Jeremia mu wina hanga afwilemo. Alioze ni ukwaso wa Yehova, iye yalilamwina!

Yika muhasa kulilongesa ha chilweza cha Jeremia?— Chipwe ngwe iye kevwile woma, nihindu kakechele kuhanjika hakutwala kuli Yehova. Muze yena muhanjika hakutwala kuli Yehova, atu mahasa kukukekuna hanji kukuvwila uli. Ha chino, yena muhasa kwivwa sonyi hanji woma. Alioze kanda wecha kuhanjika hakutwala kuli Yehova. Iye makukwasa mashimbu eswe, ngwe chizechene akwashile Jeremia.