Ponda iwo̱, bato ba mayo̱ye̱ biso̱ to̱so̱ ba malingane̱ biso̱ ke̱ je o kwalane̱ babo̱ nje e mombweye̱ Yehova. Nika ńena e bola ná di si pula pe̱ to̱po̱ nje e mombweye̱ Loba. Wa pe̱ o másenga nika e?— Bibe̱l e malangwea biso̱ myango ma eso̱mb’a moto nu ta nu to̱ndo̱ Yehova, nde nu ta be̱be̱ o jese̱le̱ to̱po̱ nje e mombweye̱ mo̱. Dina lao di ta nde ná Yeremia. Jokwe mambo mō̱ jombwea mo̱.

Ke̱ Yeremia a dia eso̱mbe̱, Yehova a kwalane̱ mo̱ ná a langweye bato ná ba si bola pe̱ mambo ma bobe. Nika e ta Yeremia ndutu jita, a ta a bwa bo̱ngo̱. A langwedi Yehova ná: ‘Na si bi nje o kwala. Na dia nde son a muna.’ Nde Yehova alabe̱ mo̱ ná: ‘O si bwa bo̱ngo̱. Na me̱nde̱ jongwane̱ wa.’

 Wa nde Yeremia a botedino̱ langwea bato ná Yehova a me̱nde̱ ko̱kise̱ babo̱ yete̱na ba si wengisane̱. O mo̱nge̱le̱ ná bato ba boli nje Yeremia a kwalino̱ e?— Ke̱m. Ba yo̱ye̱ nde mo̱, ba lingane̱ pe̱ mo̱ jita. Bato bō̱ mo̱me̱ne̱ ba puli na bwa mo̱! O mo̱nge̱le̱ ná Yeremia a ta nde a senga ne̱ni e ?— A ta a bwa bo̱ngo̱, mo̱ ná: ‘Na si me̱nde̱ pe̱ to̱po̱ nje e mombweye̱ Yehova to̱ buńa.’ Nde ese̱le̱ so̱ bola nika na mbale̱ e?— Ke̱m, a s’ese̱le̱ to̱po̱. A ta a to̱ndo̱ Yehova jita, ońola nika nde a si wusano̱ jese̱le̱ to̱po̱ nje e mombweye̱ Yehova. Nika Yeremia a s’ese̱le̱no̱ so̱, Yehova a ta a tata mo̱.

Eyembilan ewo̱ ye nde ná, buńa bō̱, bato ba bobe ba pimbi Yeremia oteten a tongo ekukudu ni londi na dibo. A si kusi da to̱ madiba oten. Ba bato ba ta ba pula jese̱le̱ Yeremia oten ná a wo̱. Nde Yehova ongwane̱, a busi oten!

Nje eyembilan a Yeremia yeno̱ ná yokwe̱le̱ wa e?— To̱ na nika a tano̱ a bwa bo̱ngo̱ ponda iwo̱, a s’ese̱le̱ to̱po̱ nje e mombweye̱ Yehova. O makwalisane̱ te̱ bato nje e mombweye̱ Yehova, bená ba yo̱ye̱ wa to̱so̱ ba lingane̱ wa. Wena o bwa iso̱n to̱ bo̱ngo̱ mo̱me̱ne̱. Nde, to̱ buńa, o s’ese̱le̱ to̱po̱ nje e mombweye̱ Yehova. A me̱nde̱ jongwane̱ wa ponda te̱, ka ne̱ni ongwane̱no̱ Yeremia.