Eda vakalialiai se cudruvi ena so na gauna nida tukuni Jiova. E rawa sara ga nida nanuma meda sa kua ni tukuna na veika me baleti koya. O bau sotava qori?— E vakamacalataki ena iVolatabu e dua na cauravou e lomani Jiova, ia e nanuma me sa kua ni tukuna na veika me baleti koya. Na cauravou qori o Jeremaia. Meda wilika mada eso na ka me baleti koya.

Ni se cauravou o Jeremaia, a tukuna vua o Jiova me vakasalataki ira na lewenivanua mera muduka nodra ivakarau ca. E dredre dina qori vei Jeremaia, a rere tale ga. E tukuna vei Jiova: ‘Au sega ni kila na ka meu tukuna. Au se gone.’ Ia e kaya o Jiova: ‘Kua ni rere. Au na vukei iko.’

 A mani vakasalataki ira na lewenivanua o Jeremaia nira na totogitaki ke ra sega ni veisau. Vakacava era muria na vosa i Jeremaia?— Sega. Era vakalialiai koya ra qai cudruvi koya vakalevu. Eso era via vakamatei koya sara! Cava e vakila o Jeremaia?— A rere qai kaya: ‘Au sa na sega tale ni tukuni Jiova.’ Ia vakacava a soro dina?— Sega. E tukuni Jiova tiko ga ena levu ni nona lomani koya. A taqomaki Jeremaia o Jiova ni a sega ni soro.

Kena ivakaraitaki, era kolotaki Jeremaia eso na tamata ca ena dua na qara e tu kina na soso. E sega na kena kakana se mena wai. Era vinakata o ira qori me mate o Jeremaia ena qara ya. Ia e dro rawa ena veivuke i Jiova!

Cava o vulica vei Jeremaia?— A rere ena so na gauna, ia e tukuni Jiova tiko ga. Era na vakalialiai iko se cudruvi iko eso ni o tukuni Jiova. O na rairai madua kina se rere, ia mo tukuni Jiova tiko ga. Ena vukei iko e veigauna me vaka ga nona vukei Jeremaia.