Wonnde yimɓe jallay en maa ɓe monanoo en si en yewtii ɓe fii Yahuwah. Sabu ɗun en faalete accude haalugol fii Allah. Sifa ɗun heɓii on ? — Deftere Allah nden no yewti en fii suka yiɗunooɗo Yahuwah, kono fayda o accuno haalude fii makko. On suka ko Yeremiiya o innetenoo. Etoɗen annden fii makko.

Gila ko Yeremiiya wonunoo suka, Yahuwah daalanno mo yo o waajo yimɓe ɓen fii wota ɓe waɗu piiji bonɗi. Ɗun sattanno mo moƴƴa e hari himo huli. O yeetii Yahuwah : « Mi anndaa ko mi haala. Ko mi cukalel. » Kono Yahuwah daalani mo : « Wota hulu. Mi wallete. »

 Ko ontuma Yeremiiya fuɗɗii waajaade yimɓe ɓen, o wi’i ɓe si ɓe accaali waɗugol ko boni, Allah donkinay ɓe. Hiɗon sikkude ɓe waɗuno ko Yeremiiya waajinoo ɓe kon ? — Oo’o. Ɓe jaluno mo maa ɓe monanii mo. Woɓɓe faalano hay warugol mo ! Ko honno Yeremiiya wonirnoo ? — O huluno e o wi’i : « Mi haalataa fii Yahuwah hannde kadi. » Kono o accuno waɗugol ɗun ? — Oo’o, o accaali. Hakkee ko o yiɗunoo Yahuwah, o waawataano wonude o haalaali fii makko. Ɓayri Yeremiiya accaali haalugol fii makko, Yahuwah dannduno mo.

E piide misal, yimɓe bonɓe goo ukkuno Yeremiiya e nder woyndu wondundu e loope. O alaano ɲaamete maa ndiyan yareteeɗan. Ɓe faalano accude Yeremiiya ton fii yo o maayu. Kono e hoore bawgal Yahuwah ngal o daɗuno.

Ko honɗun misal Yeremiiya ngal janni on ? — Fii kala o hulayno wonnde, o accaano haalude fii Yahuwah. Si on haalii fii Yahuwah, woɓɓe jallay on maa ɓe monanoo on. Wonnde haray hiɗon sonnjii maa haray hiɗon huli. Kono hinaa yo on accu haalude fii Yahuwah. O wallay on no o walliri Yeremiiya non.