N tabetai, ao a bwainingareira aomata ke a un iroura ngkana ti maroroakina taekan Iehova nakoia. E kona te aro aei ni kairira bwa ti na katoka tataekinan taekan te Atua. Ko a tia n namakina anne?— E taekinaki n te Baibara taekan te teinimwaane ae e tangira Iehova ma e kuri ni katoka tataekinan taekana. Arana bon Ieremia. Ti na reiakina riki taekana.

Ngke te teinimwaane Ieremia, ao e tuangaki iroun Iehova bwa e na kauringia aomata bwa a na katoka karaoan ae buakaka. E rangi ni kangaanga karaoan aei iroun Ieremia ao e maaku naba. E taku nakon Iehova: ‘I babanga n taetae bwa te teei ngai.’ Ma e taku Iehova: ‘Tai maaku bwa N na buokiko.’

 Ai ngaia are e a moana kauringaaia aomata Ieremia, bwa a na katuuaaeaki ngkana a aki bitii maiuia. N am iango, a karaoa tuangaia aomata iroun Ieremia?— A bon aki. A bwainingareia ke a rangi n un irouna. Iai naba aika a kan tiringnga! N am iango, tera ana namakin Ieremia?— E maaku ao e taku: ‘N nang aki manga taekina taekan Iehova.’ Ma e bwara nanona?— E bon aki. E rangi n tangira Iehova n te aro are e a aki kona ni katoka tataekinana. Ao ibukina bwa e aki bwara nanon Ieremia, e a kamanoaki iroun Iehova.

N te katoto, n te taina ao iai mwaane tabeman ake a karenakoa Ieremia nako nanon te mwanono ae nano ae on n te bokaboka. Bon akea iai kanana ke nimana. A kani katuka Ieremia n te tabo anne mwaane akanne bwa e na mate iai. Ma e reke maiuna man ana ibuobuoki Iehova.

Tera ae ko kona n reiakinna man ana katoto Ieremia?— E ngae ngke e namakina te maaku n tabetai, ma e teimatoa n tataekina taekan Iehova. Ngkana ko tataekina taekan Iehova, ao a kona aomata ni bwainingareiko ke n un iroum. Ko na bae n namakina te maamaa ke te maaku naba. Ma teimatoa n tataekina taekan Iehova. E na buokiko n taai nako n aron are e buoka Ieremia.