Tɛm busebo, to san ni tɔɣera Yehowa yele bɔ’ɔra nɛreba, ba ni la’ara to mɛ bii ba eŋɛ ti to sunsɔa nyiie. Wana ta’an basɛ ti to ka bɔta to le tɔɣɛ Yehowa yele. La tabelɛ ana hon bala?​— Baabule la tɔɣɛ bunbilipaalega ayima n yuun nɔŋɛ Yehowa yele ge ti la yuun gee fii la a zaɣesɛ kan tɔɣɛ a yele. A yu’urɛ yuun dela Yeremia. Basɛ ti to zamesɛ a yele.

Yeremia n yuun de bunbilipaalega la, Yehowa yuun yele en ti a yele nɛreba la ti ba basɛ ba be’em tuuma. Dena yuun kpe’em bo Yeremia mɛ ge ti dabeem yuun tara en. A yuun yele Yehowa yeti: ‘N ka mi yetɔɣum. N nan dela bia.’ Ge Yehowa yuun yele en yeti: ‘Da zɔta dabeem. Mam boi mɛ la ho.’

 Bala ti Yeremia yuun pɔsɛ yɛta nɛreba la ti ba san ka tee, ba wan nyɛ tuberɛ dɔlegerɛ. Hon ti’isɛ ti nɛreba la yuun eŋɛ Yeremia n yuun yele sɛla la?​— Aayi. Ba yuun la’ari en mɛ ge ti ba sunsɔa yuun nyiie la en. Hali basɛba yuun boti ba ku en mɛ! Hon ti’isɛ ti la yuun ana Yeremia la wani?​— Dabeem n yuun tari en ti a yeti: ‘Mam kan le tɔɣɛ Yehowa yele.’ Ge a yuun sirum zaɣesɛ mɛ?​— Aayi, a yuun ka zaɣesɛ. Eŋa n yuun nɔŋɛ Yehowa se’em la, a yuun kan sakɛ zaɣesɛ kan tɔɣɛ a yele. Bala la, Yeremia n yuun ka zaɣesɛ la, Yehowa me yuun faaɛ en basɛ mɛ.

Makerɛ n wana, nɛrebɛ’ɛsi basɛba yuun dekɛ Yeremia eŋa la boko n pirɛ la bɛgerɔ. Ba yuun ka boi en dia bii ko’om. Ba yuun boti la Yeremia ki boko la poan. Ge Yehowa yuun soŋɛ en ti a piɛ!

Hon zamesɛ la bem yese Yeremia zɛ’an?​— La boi bini ti tɛm busebo dabeem yuun tari en ge a yuun ka zaɣesɛ ti a kan tɔɣɛ Yehowa yele. Ho san tɔɣɛ Yehowa yele, nɛreba ta’an la’ara hɔ bii ba sunsɔa nyiie la hɔ. Daanse’ere vi ta’an di ho bii dabeem tara ho. Ge da malum zaɣesɛ ti ho kan tɔɣɛ Yehowa yele. A wan kelum soŋɛ hɔ wuu eŋa n yuun soŋɛ Yeremia se’em la.