Nega haida taunimanima dekenai Iehova ita herevalaia neganai, ita idia kirikirilaia o ita dekenai idia badu. Unai dainai reana ita ura lasi Dirava ena ladana ita herevalaia. Oi be nega ta unai bamona oi mamia vadaeni, a?— Baibel ese Iehova ia lalokau henia matamata merona ta ia herevalaia, to unai mero ese kahirakahira Iehova herevalaia karana ia hadokoa. Iena ladana be Ieremia. Mani iena sivarai ita herevalaia.

Ieremia be ia do matamata neganai, Iehova ese ia hamaoroa taunimanima do ia sisiba henia kara dika idia karaia lasi totona. Ieremia ese unai ia karaia be auka, bona ia gari danu. Iehova ia hamaoroa: ‘Lau diba lasi dahaka do lau hereva. Lau be mero matamata sibona.’ To Iehova ia gwau: ‘Oi gari lasi. Lau ese oi do lau durua.’

 Unai dainai Ieremia ese taunimanima ia sisiba henia, bema edia kara idia haidaua lasi, Iehova ese idia do ia panisia. Oi laloa taunimanima be Ieremia ena hereva idia badinaia, a?— Lasi. Ia idia kirikirilaia bona ia dekenai idia badu. Haida idia ura Ieremia do idia alaia! Oi laloa Ieremia be edena bamona ia mamia?— Ia gari bona ia gwau: ‘Lau be Iehova do lau herevalaia lou lasi.’ To momokani Iehova ia herevalaia lou lasi, a?— Lasi. Iehova ia herevalaia noho badina Ia ia lalokau henia bada. Unai dainai, Iehova ese Ieremia ia naria.

Hegeregere, nega ta tatau haida ese Ieremia be kopukopu ia noho gurina ta lalonai idia negea diho. Ia dekenai aniani bona ranu be lasi. Unai tatau idia ura Ieremia be guri lalonai do idia rakatania ia mase totona. To, Iehova ena heduru dainai Ieremia ia roho mauri!

Ieremia ena sivarai amo dahaka oi dibaia?— Ena be nega haida ia gari, to ia ese ma haida dekenai Iehova herevalaia karaia ia hadokoa lasi. Oi be ma haida dekenai Iehova oi herevalaia neganai, reana oi do idia kirikirilaia o oi dekenai do idia badu. Reana do oi hemarai bona gari danu. To, namo lasi Iehova herevalaia karana oi hadokoa. Ia ese nega ibounai oi do ia durua, Ieremia dekenai ia karaia bamona.