Povikando tjiva ovandu ve tu tjita ouhahu poo ve tu pindikira indu tji matu hungire kuna wo ohunga na Jehova. Otjiṋa hi mape ya atji tjiti kutja tu vange okuisa okuhungira ohunga na Mukuru. Ove wa rora okurimuna nao?— Ombeibela i hungura ohunga nomutanda ngwa suverere Jehova nungwari ngwe ripura okuisa okumukarera. Ena re ra ri Jeremia. Indjo tu rihonge ovingi ohunga na ye.

Jeremia tja ri omutanda, Jehova we mu raera kutja nga rakize ovandu okuisa okutjita oviṋa ovivi. Ihi tjari otjiṋa otjizeu ku Jeremia, nu aa tira. Eye wa tja ku Jehova: ‘Hina okutjiwa kutja hi tje vi. Ami ngunda owami omuatje.’ Nungwari Jehova wa tja: ‘O tira. Ami me ku vatare.’

 Okutja Jeremia wa uta okurakiza ovandu kutja mave verwa tji ve hina okurundurura otjikaro tjawo. Mo munu kutja ovandu va tjita otja Jeremia pe ve rakiza po?— Kako. Owo aave mu tjiti ouhahu nu tjiva ve mu pindikira. Varwe wina aave vanga okumuzepa! Mo munu kutja otjiṋa hi tja ṱuna vi ku Jeremia?— Eye aa tira nu ookutja: ‘Ami hi nokuhungira ko rukwao ohunga na Jehova.’ Eye tjiri wa tjita nao po?— Kako, katja tjita. Eye wa suverere Jehova tjinene ngandu tje hina aa yenene okuisa okuhungira ohunga na ye. Mo tjimbe tjokutja Jeremia kena pe rihahiza, Jehova we mu yama.

Otjotjihorera, otjikando tjimwe ovarumendu vovikaro ovivi ve mu yumba motjitoto otjikoto tjinene mu mwe urire omunoko. Eye kari novikurya poo omeva okunwa. Ovarumendu mbo aave vanga okumuesa motjitoto kutja ma ṱe. Nungwari nombatero yaJehova, Jeremia wa yamwa!

Ove mo rihongo tjike okuza kotjihorera tjaJeremia?— Nandarire kutja povikando tjiva aa tira, kena pa isa okuhungira ohunga na Jehova. Tji mo hungire ohunga na Jehova, ovandu tjiva mape ya ave ku tjiti ouhahu poo ave ku pindikire. Porumwe mape ya o utu okuṱohoṋi poo okutira. Nungwari ove o isa okuhungira ohunga na Jehova. Eye aruhe me ku vatere tjimuna tja vatera Jeremia.